Footer

Naipasngay nga ubing iti Candon City, maysa a sirena?

CANDON CITY –  Kabayatan ti panagindurog ti napigsa a tudo gapu iti ilalabas ni Bagyo Karen, maysa a maladaga a kaar-arngi ti sirena ti naipasngay iti Barangay Patpatta Segundo, ditoy a siudad.

Pannakakellaat ken pannakasdaaw ti naimaldit iti rupa dagiti nagannak, da Larry Orfiano, 36, ken ti asawana a ni Ruby, 25, idi makitada ti langa ti anakda: awanan iti ubet ken mabagbagi, kasla ipus ti ikan ti sakana ken basbassit ngem iti kadawyan a lapayag ti ubing ti lapayagna.

Naipasngay idi Agosto 21 iti daytoy a tawen ti ubing. Daksanggasat ta saan a nagbayag. Natay met laeng kalpasan ti awan pay maysa nga oras.

Maikapat koma nga anak da Ruby ti ubing. Ni Nennyme, 5, ti inaunaan; maikadua ni Jennifer, 3, ket maikatlo ni Amboy a dua ti tawenna.

Kinuna ni Ruby Orfiano a patienna a ti kangrunaan nga agbibiag iti teleserye a Marina ti naginawanna isu a kasta ti langa ti anakna. Magustuanna kano ngamin a buybuyaen ti nasao a telenobela iti ABS-CBN.

“Wen, paboritok ngamin ni Claudine Barreto, ket ti Marina a nagbidaanna ti inaldaw a buybuyaek iti telebision,” inannugot ni Ruby iti pannakiuman kenkuana toy nagsurat.

Agwerret ti estoria iti maysa a sirena, ni Marina, iti panagakem ni Claudine Barreto, maysa kadagiti kalatakan a movie ken TV star iti bakud ti ABS-CBN.

Kinuna ni Ruby a maliwayanna payen ti agluto iti pangngaldawda no dadduma gapu ta bumangir metten iti balay a pagbuyaanna iti  nasao a telenobela.

Kayo ti pagtaengan dagiti agassawa ken nagdiding iti bulong ti nyog. Awan ti koriente iti balayda ken awan ti telebisionda. Gapuna a mapan  makibuybuya ni Ruby kadagiti kaarrubada nga addaan telebision.  Inaldaw nga aramidenna daytoy.

Inaklon ni Larry a no dadduma, isunan ti agluto iti pangaldawda no mapan makibuya ti asawana iti paboritona a telenobela.

“Panaganak koma iti Marina, ngem dimi met ammo no lalaki wenno babai,”  kinuna ni Ruby idi dinamagmi no ania ti imbuniagna iti anakna.#

 

Comments are closed.