Footer

OPINION: Ti kari a naisurat iti rabaw ti danum

Iti naminsan, nagkari ni Pres. Gloria Macapagal-Arroyo a saanen nga agtaray a para presidente iti mismo a sanguanan ti monumento ni Dr. Jose Rizal iti  panangselebrar ti pagilian iti pannakaiyanak ti nailian a bannuar ngem saan a natungpal dayta a waragawag. Agpatingga laeng gayam dayta a  kari  iti waragawag a saan nga agmata wenno tumaud a kinapudno agsipud ta  naisuratda laeng iti rabaw ti danum.

No naisuratda laeng iti rabaw ti danum, kayatna a sawen, agpatingga laeng ditan kalpasan ti panangiwaragawag   ket saanen a dumur-as wenno matungpal agsipud ta maiwalin wenno malipatan, kas itay  kunada a “kari nga  intayab ti kali”.

Iti panagtung-ed ti administrasion iti Resolutiuon No. 10 a mangawag iti Kongreso para iti constituent assembly a mangamiendar iti konstitusion tapno maipagna ti panagbalbaliw ti porma ti gobierno a kas federal, saan a maikkat dayta dakkel unay a panagduadua a kayat laeng ti Pangulo nga umatiddog ti panagtakemna. Saan a maikkat ti panagduadua iti nalimed nga agenda iti kellaat nga iyaanamong ti administrasion kalpasan a  saan man laeng a  pulos a nadakamat daytoy a tungtongan iti napalabas a SONA.

Nupay nainget la  unay ti panangtubngar ken panangidarirag ti administrasion nga awan ti kinapudno ti adda iti panunot dagiti umili a kayat laeng a paatiddogen ti Pangulo ti terminona, saan a maikkat ti panagduadua gapu iti dina panangtungpal iti inkarina a dinan panagtaray iti eleksion kalpasan ti terminona. Sumangkautro, naakusaran pay iti panagkusit iti eleksion idi 2004. Dakkel a gerret dagiti umili ti namati itoy alegasion.

Saan a maikkat kadagiti umili ti dida panamati iti waragawag ti Pangulo ta napasamaken iti kallabes. No maysa koma a nangisit a tinta dayta a kari a naisuyat iti nakapudpudaw a tisiert,  namantsaanen daytoy a saan a pulos a maikkat. Napellasanen ti kinasayaatna. Namantsaan metten ti  panunot dagiti umili. Ti mantsa ket mantsa.

Saan a dagiti umili ti nanginaw ken nangipasngay iti saanda a panagtalek. Mismo a ti Pangulo ti nagtaudanna gapu kadayta  biddut a pannanganna iti bukodna a sao. Isu a mismo ti nangkali iti nalawa ken nauneg nga abut nga isu a mismo ti naikursong. Isu a mismo ti nangipallangatok iti bato iti ngato a nagdisso a mismo iti ulona met laeng.

Iti 2008 SONA, kuna ti Pangulo, "For the remainder of my term until I step down in 2010, the best thing we can do is to stay focused on economic reforms, while providing peace, order and stability." Idi inkarina iti sanguanan ti monumento ti nailian a bannuar a saanen nga agtaray a para Presidente ngem dina tinungpal, kasano ngarud a mapapatina dagiti  umili iti   waragawagna iti SONA? No sibibiag ti nailian a bannuar, sigurado la ketdi nga agmisuot gapu  ta naaramat laeng a kas paganudan iti kabukbukodan a panggep.

Ti makunami, nasaysayaat ti aramid ngem ti sao. Aramid ti pakakitaan.

No maminsan, iti ngiwatna ti  pakaidaramudoman ti maysa a tao ta  maikaglis no kua ti saan a nariendaan a dilana. Ngem iti di panangrienda ti dila iti ibagbagana, ditoy met a manguram iti kinaasino. No ania ti imbaga, tungpalen tapno agraem dagiti tattao. Ti tao nga addaan iti maymaysa a sao itandudo a mismo dagiti saona. 

Isu a nasaysayaat nga agtrabaho koma ni PGMA ken ti gobiernona  ngem ti sao a sao.#

 

Comments are closed.