Footer

PITIK: Dagiti umili ti kadakkelan a biktima

Umad-adu ti bilang dagiti sibilian a nagudas gapu iti panagranget ti MILF ken dagiti tropa ti gobierno. Rinibribu metten ti nangpanaw kadagiti pagtaenganda ket nagpaknida tapno saanda a mairamraman iti riribuk.

Nagramut daytoy a gulo gapu iti saan a pannakaituloy ti panagpinnirma ti gobierno ken ti MILF iti memorandum of agreement mainaig iti ancestral domain ti Bangsa Moro.

Kuna ti MILF a saan nga agtalna agingga iti saan a maited kenkuana dagiti daga a talaga a para kadakuada a Muslim.

Iti sabali a bangir, kinuna ti gobierno a maysa a traidor ti MILF gapu iti panangtallikudna iti maipagpagna a saritaan iti kappia.

Ket agingga iti awan ti pagsabtan dagitoy dua a puersa, agtultuloy ti riribuk.

Dagiti ordinario nga umili ti kadakkelan a biktima iti riribuk. Isuda dagiti maipit iti nagbaetan ti dua nga agtintinnim-og a bato.

Kakaasi met dagitoy a kakailian a napadisi iti pagtaenganda gapu laeng iti MOA a saan a napirmaan!

 – – – – –

Maysa ti pagilian kadagiti kadarasan nga umadu ti populasionna iti sangalubongan.

No saan a malapdan daytoy, saan a mainsasaan nga agbalin ti populasion a kangrunaan a problema ti kagimongan iti pagilian.

Siempre, gapu iti ad-adu a ngiwat a pakanen dagiti pamilia, bumasbassit dagiti taraon a pagraranudanda. Iti yaadu ti populasion, umadu dagiti awanan panggedan, bumasbassit dagiti matgedan, bumaba ti kalidad ti panagbiag.

Maymaysa ti kayat a sawen ti di malapdan a panagsuyop ti populasion: napaay ti programa  a panagplano ti pamilia.

Ngem kasano nga agballigi ket mapaliiw nga ad-adda met a dagiti babbai ti ad-adalan dagiti adda iti salun-at mainaig iti responsible a panagpamilia?

Iti biangmi, ad-adda ketdi a dagiti lallaki ti guyugoyenda a makipartisipar iti panagplano iti pamilia.

Apay? Iti katre wenno papag, saan a ti babai ti ad-adda a kumalbit no di ti lalaki. No kumalbit ti lalaki, kapilitan nga agpabus-oy ni babai. No saan, nakarkaro pay ngem gerra diay Iraq ti mapasamak!

– – – – – –

Nagawid dagiti atletatayo nga ima-ima manipud iti Beijing Olympics. Awan uray maysa laeng a medalia a nakalam-itda. Ti nakas-ang, dida pay dimmur-as uray iti maikadua laeng a rikus. No boksing koma, nanabtuogda metten iti umuna a disnog.

No amirisen, saan a paatiw dagiti umaayamtayo. Adu dagiti nagrimat ti naganna iti internasional a kumpetision.

Ngem apay a kastoy ti nagbanagan ti sports iti pagiliantayo?

Maymaysa ti sungbat, kailian. Saan a maited ti naan-anay a suporta kadakuada. Kasano nga umasenso ti maysa nga atleta no agkurkurang ti abastona, ti ipaunegna a taraon, daan dagiti pasilidad a pagsanayanna, kurang dagiti ramit nga usarenna ken nakisang dagiti exposurena iti internasional a paay-ayam?

Kasano a dida mabaybay-an ta pinnolitika met la ti ammo dagiti opisial dagiti sports organization?

 

Comments are closed.