Footer

BANNER NEWS: Dagitinto laengen addaan family access card malakuan iti nalaklaka a presio: NFA

BANTAY, Ilocos Sur – Kinuna ni National Food Authority provincial
officer Engr. Fortunato Bulao a dagitinto laengen addaan iti family
access card ti malakuan iti nalaklaka a presio a bagas ket posible a
maipakat daytoy sakbay ti panaggibus ti tawen.

Inannugot ni Bulao a mayim-implimentaren iti Metro Manila ken kadagiti highly urbanized a luglugar a dagiti laengen addaan iti family access card ti malakuan iti P18.25 a presio ti bagas ket puntiria ti NFA ditoy a maiwayat daytoy kadagiti Tindahan Natin outlets iti probinsia ti Ilocos Sur inton Oktubre.

Kinuna ni Bulao bayat ti interbio kenkuana ni Jun Ramos iti programa daytoy a Barangay Commando-Brigada nga obligarendanto metten uray dagiti rolling stores ken Tindahan ng Parokya a dagiti laeng addaan iti family access card ti malakuan iti P18.25.

Segun iti provincial officer, naakkalen idi pay la Hulio iti uneg ti tiendaan ti institutionalized a Bigasan ni GMA, ket saandan nga aglako iti P18.25 no di P25 kada kilo.

Innayonna a ti P18.25 a presio ti bagas ti NFA ket naipan iti community-based outlets a pro-poor outlet program ti turay kas iti rolling stores, Tindahan Natin ken Tindahan ng Parokya ket dagitoy laengen ti mapalubosan nga aglako iti daytoy nalaklaka a presio.

Segun ken ni Bulao, maikkatto manen ti P18.25 a presio ti NFA rice kadagiti Tindahan Natin outlets no awan ti maiparangda nga inyisio ti DSWD a family access card ket agilakodanto metten kadakuada iti P25/kilo.

Kinuna ni Bulao nga adda 250 a pamilia nga inlista ti DSWD a serserbian dagiti naakredit a Tindahan Natin outlets ket tunggal gumatangda iti bagas iti NFA, kasapulan nga adda ipakitada a lista ti 250 a pamilia a nairanta a serserbianda iti lugarda.

“Dagiti awanan iti family access card, mailakonto (NFA rice) kadakuada ti P25/kilo,” kinuna ni Bulao.

Kinuna ni Bulao a “mangipakita a dagitoy laeng talaga a less privileged a kailiantayo (isu laeng) ti makinabang iti nalaklaka a presio.”#

 

Comments are closed.