Footer

EDITORIAL: Ipakita ti gobierno a kontroladona ti situasion

Iti panangraut ti MILF kadagiti sumagmamano a villages iti North Cotabato gapu iti saan a pannakapirma ti memorandum of agreement ti ancestral domain, nasilmutan manen ti riribuk iti Mindanao. Gapu iti panagrinnupak ti tropa ti gobierno ken MILF, nagbakuit dagiti rinibribu nga umili gapu iti pannakaipitda iti ranget. Adda ita dagiti residente kadagiti evacuation centers ket adu kadakuada ti mabuteng pay nga agsubli iti lugarda ta mabutengda iti posible a panagsubli dagiti rebelde a Muslim ket mapapatayda a kas iti napasamak kadagiti kailianda.

Gapu iti daytoy, inwaragawag ti maysa a grupo a maaw-awagan iti Ilaga ti iruruarda ken panagtagiarmasda manen tapno salaknibanda ti lugarda kadagiti MILF.

Dimi ayonan ti panagtignay manen dagiti vigilante group iti Mindanao, lalo la  unay ti nalatak a Reform Ilaga Movement ken uray aniaman nga armado a civilian volunteer organization. Mangibunga laeng daytoy iti nakarkaro a riribuk iti Mindanao.

Maipalagip nga idi Hunio 1971,  minasaker ti Ilaga dagiti 65 a Muslim – lallaki, babbai ken ub-ubbing- iti uneg ti maysa a mosque. Nakaam-ames daydi a buya a panagpungsay ken panangpingas ti bihilante a grupo kadagiti ulo ken lapayag dagiti biktimada sada inaramid a kuentas a kas pannakatropeo ti kultoda.

Saan a bastabastaen ti Ilaga iti Central Mindanao ta addaanda iti agarup nasurok a 10,000 nga armado a pasurot ken kasta met laeng iti kaadu  a suportersda, segun ken ni Mike Santiago, spokesperson ti grupo. No agarmas manen dagitoy de-anting-anting nga a grupo, dumapo la ketdi ti Mindanao.

Ngem no agaktibo manen dagitoy a vigilante group ken armado a CVO, nalawlawag pay ngem agmatuon nga init ti mensahe a saan a kabaelan a solbaren ti gobierno ti parikut iti Mindanao.

Makunami a nasaysayaat a nayonan ti AFP ti agdama a Citizens Armed Forces Geographical Unit wenno CAFGU a pannakamata, lapayag ken kakontakna  iti komunidad iti iraraut dagiti rebelde. Ngem nasken  a saan laeng a Kristiano no di pay  Muslim ken Lumad dagiti mainayon a CAFGU tapno saan a makuna nga adda maidaddaduma a grupo.

Saan koman a maulit ti masaker iti  mosque sadiay Barangay Manili, Carmen, North Cotabato ken awan koman ti maisaruno ken daydi Italiano a padi Father Tullio Favali nga agpapada a biktima ti Ilaga.

Maigunamgunam iti gobierno a dina ipalubos ti panagarmas dagitoy a grupo.  Ipakita ketdi ti gobierno a kabaelanna a parmeken ti MILF ken salakniban dagiti kailian iti Mindanao a saan a kasapulan nga agarmar dagiti bihilante a grupo para iti pannalaknibda.   Ipakitana a kontroladona ti agdama a situasion iti Mindanao.# 

 

Comments are closed.