Footer

Iti panaglukat ti Buridek Museum, aldaw dagiti ubbing: Mayor Eva

VIGAN CITY – Kinuna ni Mayor Eva Marie S. Medina a nairanta nga aldaw dagiti ubbing ti panaglukat ti ‘Buridek’ Children’s Museum.

Kinunana a pinagkurrida ti nagpanunot kadagiti pangparagsak kadagiti ubbing iti daytoy nga aldaw. 

Pormal a maluktan inton Septiembre 8 ti Buridek Children’s Museum a naipasdek iti Mira Hills Fil-Spanish Friendship Park ditoy kas paset ti selebrasion ti UNESCO World Heritage Cities Solidarity Day ken ti maika-250 a tawen ti Nueva Segovia ken daytoy a siudad.

Idi Septiembre 7, 1758, naiyalis ti Diocese ti Nueva Segovia manipud Lallo, Cagayan iti Vigan babaen ti royal decree nga impaulog ni Ari Fernando II.

Linaon pay ti dekreto nga agingga nga adda ti diocese ti Nueva Segovia ken nakatakder ti katedral ti Vigan, agtalinaed daytoy a siudad.

Kinuna ti mayora a mayarig iti children’s party ti opening ti nasao a museum a malaksid kadagiti pakpakaut, addanto dagiti cotton candies, popcorns ken dadduma pay a pagaayat dagiti ubbing a kanen a maiwaras kadakuada bayat ti nasao nga okasion.

Naammuan iti mayora a sabsabali a klase ti inbitasion ta maysa a balikutsa a nabungon iti wrapper ti naipalaon.

Kinuna ni Medina a saan a laso ti makartib iti panaglukat ti museo no di mawarwar ti nalagalaga a lastiko babaen ken ni Fr. Isidro Abaño, secretary general ti University of Santo Tomas, ken iti panangbayabay dagiti napili a gifted children. Kangrunaan a sangaili ni Cong. Ronald Singson  iti nasao nga okasion a tabunuan pay dagiti opisial ti probinsia, mamayor a kameng ti Metro Vigan Coordinating Council, ken dagiti opisial ti Lallo, Cagayan.

Naipasdek ti nasao a museo babaen ti panagkinnamayyet ti gobierno ti siudad  ken ti Center for the Conservation of Cultural Properties and the Environment in the Tropics of the University of Sto.Tomas (UST CCCPET) babaen ken ni Prof. Eric B. Zerrudo kas executive  director ti Metropolitan Museum sadiay Manila.

Mabuya iti museo ti miniature ti Calle Crisologo, kalesa, dagiti retrato dagiti prominente a Bigueños, lokal a historia, ken dadduma pay a pakaitantuduan ti kinapateg ti ubing iti maysa a pamilia.

Ubbingto pay ti mangi-tour kadagiti sangaili kalpasan a maluktan ken mabendisionan dagiti tallo a pasdek ti museo, kinuna ni Mayor Medina.#

Comments are closed.