Footer

Kaunaan a maiyanak iti Septiembre 7, premioan ti Vigan City govt

VIGAN CITY – Impakaammo ni Mayor Eva Marie S. Medina a maysa kadagiti tampok iti pannakaselebrar ti maika-250 nga anibersario ti Nueva Segovia  ken daytoy a siudad ti pannakaited ti premio iti kaunaan a maiyanak nga ubing iti Septiembre 7.

Segun iti mayor, addanto maysa a team nga agbantay iti Gabriela Silang General Hospital  (GSGH) mangrugi iti 12 a.m. ti Septiembre 7 a mangmonitor kadagiti maiyanak nga ubbing a pakapilian iti maikkan iti premio.

Kinuna ni Medina a napili ti GSGH a pagmonitoran kadagiti maiyanak nga ubbing ta ad-adda a dagiti laeng napanglaw a pamilia ti mapmapan itoy nga ospital tapno aganak.

“No iti public hospitalka ng aganak, kayatna a sawen a dimo kabaelan ti aggasto iti pribado a balay-pagagasan. No met iti pribado, kayatna a sawen addaanka, isu nga iprioridadtayo dagiti awanan,” palawag ni Medina.

Naammuan iti mayora nga  iti panagmonitorda kadagiti masikog a Bigueño, adda  59 a posible nga aganak iti dayta a petsa. Mairaman ditoy ti 8 iti Ayusan Norte, 5 iti Salindeg, 5 iti Raois, 4 iti Bongtolan, 4 iti Mindoro, 3 iti Ayusan Sur, 3 iti Bulala, 3 iti Pantay Laud, 3 iti Capangpangan, 3 iti Beddeng Laud, 2 iti Brgy. I, 2 iti Brgy. III, 2 iti Brgy. IV, 2 iti Tamag, 2 iti Cabaroan Daya, 2 iti San Pedro, 1 iti Rugsuanan, 1 iti Camanggaan, 1 iti Beddeng Daya, 1 iti Cabalangegan, 1 iti Paratong, ken 1 iti Bgry. VII.

Karaman iti premio nga ipaay ti city government ti scholarship para iti ubing manipud iti elementaria agingga nga aggraduar daytoy iti kolehio, kasta metten ti agduduma a masapsapul ti maladaga kas dagiti lampin, bado, diapers ken ay-ayam. Maikkan met iti gamit ti ubing ti maikadua agingga iti maikasangapulo a maiyanak iti dayta nga aldaw.

Iti immun-una nga interbiona iti lokal a radio ditoy, inwaragawag ni Medina a maikkan iti commemmorative medal amin dagiti residente ditoy a naiyanak iti Septiembre 7.

Kabayatanna, itoy met laeng nga aldaw a mailukat ti “BURIDEK”,  maysa a museo a para kadagiti ubbing a naipasdek iti Mira Hills Fil-Spanish Friendship Park iti Bgry. VII. Kompleto iti agduduma a ramit kas iti TV, DVD players, ay-ayam ken libro, manamnama a ditoy ti pangipasiaran dagiti nagannak kadagiti ubbingda tapno maipasagepsep kadakuada ti kinapateg ti pamilia.

Minimal laeng ti entrance fee:  P10 kadagiti ubbing ken P20 para kadagiti nataengan.

Kinuna ti mayora nga amang a nalaklaka no idilig ti singir ti Museo Pambata iti Manila a P100 a para kadagiti ubbing ken P200 para kadagiti nataengan. Maipan amin a maur-or a kuarta para iti pannakapapintas pay ti museo ken ti pannakamantener ti kinadalus ti aglawlaw daytoy.

Plano met ti city government ti mangideklara iti aldaw a libre ti iseserrek iti museo ken ti pannakailibre dagiti annak dagiti indigent iti siudad.#

Comments are closed.