Footer

Opinion: Ania, salip iti kinapintas para kadagiti mamadre?

Saanmi nga ayonan daytoy kangrunaan a damag  idi napalabas a lawas a pannakaangay ti “Miss Sister 2008” a pagkokontesan iti pinnintasan dagiti mamadre!

Beauty contest  para kadagiti mamadre?  Nadadael san ti ulo daytoy a padi, kinunkunami ken ni Antonio Rungi ti Passionist Congregation sadiay Italy iti pannakapanunotna  iti pannakaangay ti Miss Sister 2008 a pagsasalipan dagiti mamadre ket mapasamak ti virtual voting iti internet babaen ti blogsitena.

Napaangeskami iti nalukay idi mabasami a saan a maiparada iti sibubukel a lubong dagiti kontestant a madre a nakaaruat iti bathing suit wenno two-piece bikini.

“Ti laeng akin-uneg a kinapintas dagiti mamadre ti maiparang a pagbibinnutosan,” kinuna  ketdi ni Rungi.

Ngem uray pay no imbagana daytoy, adu latta ti nangkondenar itoy a kapanunotanna. Itinto laengen beauty contest ket adun dagiti mangbabalaw a maysa nga ekploytesion kadagiti babbai, anianto la ketdin no mamadre dagiti agsasalip?

Sakbay a nagmadreda, naikomit dagitoyen ti bagbagida iti pannakilangenda laeng ken ni Jesus ken ti Namarsua ken inawatdan  ti naulimek a panagbiag nga adayo iti kontrobersia, ti lubong a materialistiko ken nalabes unay a panagragragsak. Apay a riribuken pay laeng ti naulimek a panagbiagda babaen ti maysa a gannuat a kas iti beauty pageant?

Saan a nasalun-at a kapanunotan a pagsasalipen dagiti mamadre tapno maibayogda  ken mapili dagiti “kapipintasan.” Ta adda aya makuna a nalaad ken napintas a madre? No kayat a sapulen ni apo padi Rungi ti kinapintas ti katatao ti maysa a madre, sapulenna iti sabali a wagas. Ta saan a dayta pisikal a bagi ti pangsapulan iti kinapintas ti maysa a madre, iti panangakseptarna laengen iti panagmadrena,  maysan a kapipintasan a pasamak iti biag ti maysa a babai.

No ugali ti sapulen, wen, adda latta nakersang ti ugalina  ket adda met napinpino agsipud ta taoda la ngarud. Ngem maysan a sakripisio ti panagmadre.  Saan a magatadan a sakripisio. Maysa dayta a panagpakumbaba,  kabaliktad ti panangibayog kadagiti madre a kas pagderrepan a banag. Nagmadreda nga awan ti namnamaenda a pannakaibayogda-pannakaidayawda. Ngamin, ti Mannakabalin ti mangparparangrang iti panagserbida Kenkuana. Apay a singaen dayta a panagserbida Kenkuana babaen ti panangiwayat iti bunga ti ‘agtrangkaso a panunot”?

Malagipko man ti kabibiag ti maysa a madre iti maysa a kongregasion iti Vigan. Nasurok nga  innem a dekadana iti uneg ti monasterio nga awan sabali nga  ubrada no di aglualo, awan unay ti agsasarita wenno agtututtot, impamaysada ti biagda iti panagaramid iti ostia ken kandela ken panagtaraken kadagiti dingo. Iti maudi a kanitona iti biag, immay dagiti kakabsatna ken sibubukel a pamiliana ket dinayawda la unay toy madre a kabsatda ta pinanawanna ti  kinanam-ay sadiay Bisaya nupay anak ti hasendero ken kabaknangan iti probinsiada.

Malagipko met ni Sis. Teodora Jalea, OSS a prinsipalmi idi idiay Narvacan Catholic School. Maysa a doktor, anak ti baknang ngem  pinanawanna ti narang-ay a biag tapno ipamaysana ti panangmuli iti panunot dagiti agtutubo iti eskuelaan.

Adu pay dagiti ammok a pakasaritaan. Makunkuna amin dagitoy a kinapintas a buya iti biag a maiduma iti pintas ti pisikal a bagi.

Miss Sister 2008? Agyamantayo iti Dios ta idi Agosto 26, naiwaragawag a saanen nga ituloy ni Fr. Rungi daytoy a panggepna kalpasan a narusrusngi iti nagkaadu a pammabalaw, saan laeng a manipud kadagiti mamadre  ken superiorna  ken dagiti obispo no di pay iti amin a sektor iti sangalubongan.

Kas kuna dagiti sutil ti utekda a nagkomento kadagiti nadumaduma a forum iti blog a bimmisitaak ken nakipartisiparak iti diskusion, no nagtuloy daytoy a kapanunotan ni Fr. Rungi, amangan no addanton  ipatulod ti Vatican iti Olympic Games,  kas iti swimming for women, beach volleyball, track and field, gymnastic ken dadduma pay. Positibo ketdi ti insungbat ni Sister Julie: kasapulan ti adu nga oras ken training iti sports, ket iserbi laengen dagiti mamadre ti orasda kadagiti agkasapulan iti komunidad ken iti panagserbi iti Dios ta dayta la ngarud ti kangrunaan a rason iti panagmadreda.  

Bareng no awanen ti makapanunot iti pannakaangay ti “Mr. Father 2008” a  labus ken naka-swimming trunks laeng dagiti maiparada a papadi. No mapasamak dayta, maibun-ay ti nabayagen a salsaluadan ken salsalimetmetan dagiti papadi iti uneg ti simbaan, makersan wenno mapellasan iti nakadakdakkel ti kaipapanan ti panggep ti kinamadre ken kinapadi.

No kayat a padayawan dagiti mamadre, apay a di suraten ti kabibiag dagitoy nga isu ti testamento iti kinaisangsangayanda a parsua? Ited koma ti para ken ni Cesar ti para ken ni Cesar.#

Comments are closed.