Footer

Review center para narses, maluktan iti Ilocos Sur

BANTAY, Ilocos Sur – Saanen a kasapulan pay nga agpa-Manila dagiti nagraduar iti kinanars iti Ilocos Sur ken kabangibang a probinsia para iti panagrepasoda para eksamen ti NCLEX-RN a kasapulan tapno makapagtrabahoda ken agnaed iti Estados Unidos ta addan review center ditoy probinsia.

Iti presscon a naangay iti opisina ni Mayor Samuel Parilla itay Septiembre 2, kinuna ni Jaime Gapasin, retired US air force captain ken maysa kadagiti akinkukua iti review center, rugianda ti dua a lawas a panangrepasoda kadagiti ageksamen a nars, walo nga oras kada aldaw, a mangrugi inton Oktubre 13 ken agpatingga inton Oktubre 22.

Innayon ni Gapasin nga awan ti quota wenno bilang nga  awatenda iti review center gapu iti tarigagayda nga ad-adu ti matulonganda nga ageksamen para iti kinanars.

Segun ken ni Gapasin, amang a nalaklaka ti P19,000 a singirenda para iti dua a lawas a panagrepaso no idilig kadagiti dadduma a review center iti Metro Manila.

“Dakkel a pakalag-anan dagiti nagannak ta  malaksid a nalaklaka, saanda payen a pakarikutan ti inaldaw a gastuen ken bayad iti pagturogan dagiti annakda,” kinuna met ni Parilla.

“Adu ti review centers ngem kaaduan a second-hand information laeng ti isursuroda. Iti Succes One, dakami a mismo ti agbalin nga instructors. Agpapadakami a nurses sadiay Amerika ket ti aktual nga ar-aramidenmi iti ospital ti isuromi,” palawag pay ni Gapasin.

Kinuna met ni Maribel Domatay a kayatna nga ibinglay dagiti personal nga ammona tapno nalaklaka a makapagtrabaho  dagiti Filipino iti ballasiw-taaw.

“Idi siak, narigatanak gapu iti language barrier. Isu a masapul a maisuro kadagiti narstayo ti makunkuna nga American way tapno dida marigatan iti kaaddada iti US,” kinuna ni Domatay.

Segun met ken ni Dr. Susan Refuerzo, pannakabagi ti University of Northern Philippines, dakkel nga oportunidad ti kaadda ti nasao a review center ditoy ta naggapu amin iti Amerika dagiti mangisuro.

Innayon pay ni Refuerzo a madadaan ti UNP a mangtulong iti Success One tapno makaala daytoy iti permit manipud iti Commission on Higher Education (CHED) para iti operasionna. Mangrugi inton Nobiembre, saanen a mapalubosan ti aniaman a pribado a review center nga ag-operate no awan ti permitda iti CHED.#

 

Comments are closed.