Footer

SALAYSAY: ITI INDAYON NI LAGIP: Adda Naituding a Kaikarian (Maikatlo a paset)

Simrekak a panadero iti Sandara Bake Shop iti Claro M. Recto, Manila. Nupay nababa unay ti sueldok a P30 laeng iti inaldaw, inan-anusak, Manong Danny. Inkagumaak ketdi ti nagurnong. No adda agawid a kalugarak, ipaw-itak ti amak banag a nakaragsakanna met.

Iti naminsan a napanak pimmasiar iti kasinsinko idiay Novaliches, impadamagna kaniak nga agaw-awat ti maysa a pabrika ti plywood iti trabahador. Nagaplayak ket kaasi ti Apo, naawatak  nga agtrabaho iti pabrika.Medio dakdakkel ti matgedak ditoy ta P120 ti sueldok ti inaldaw. Dimmakkel met ti maipawpawitko a kuarta ken ni tatang.

Ngem saan a permanente ti trabahok. Agsardengak no awan ti sumangpet a material nga usarenmi iti  pabrika. No manonto nga aldaw nga agistambayak. Gapu ta diak kapkapnekan ti kasasaadko iti trabahok, inkeddengko ti agsubli ditoy Ilokos ta tulongak ti amak nga agtalon.

“Apay a simmangpetka metten, anak? Awan kadi ti trabahoyo?” nasaludsodna.

“Nagikkatakon, tatang. Ad-adu met ti panagsardengmi nga agtrabaho ta awan ti material nga usarenmi. Isu a napanunotko ti agawid ta umayak tumulong nga agtalon,”

“Ala, ania ngarud, barok, talaga a kasta ti biag,” inyandingay ni tatang kaniak.

Ket nagkapitakan manen ti sakak, Manong Danny, iti pannakaigubetko iti kataltalonan. Immadu ketdi dagiti mulami iti talon.  Pasaray nawadwad ti maburasmi a bunga ti tarong, kamatis, okra ken otong.Siak metten ti mangilako iti produkto iti ili. No nawadwad bassit ti paglakuak iti natang, gumatangakto metten iti media kilo ti pinapaitan a karne ti baka,  ken media kilo a karne ti baboy a pagsagpawmi iti nateng tapno malanitan met sagpaminsan ti tianmi.

Kasta ti biagmi ken tatangko.

Naglabas dagiti aldaw, Manong Danny. Iti maysa a sardam, maysa a dyip ti army ti nagsardeng iti batog ti balaymi. Simmiripak iti linukipko a rikep ti tawa a nasigpit a bulong ti niog ket nakitak ti dua a soldado a nakauniporme. Simgar dagiti dutdotko. “Ania ngata, apo ti gagarada? nakunak ti nakemko idinto a dandani diak pay agkirem a mangkitkita kadakuada a simrek iti inaladan. Adda kadi nakabasolanmi? Ngem awan met ti kinaririmi wenno kasomi nga agama.

Naggapo dagiti soldado. Inlukatko ti ridaw ti balay.

“Ditoy kadi ti balay ni Ricardo Tocodan?” sinaludsod ti maysa a soldado.

“W-wen, sir. Adda kadi basolmi…? ”

Nabang-arannak idi agkatawa dagiti dua a soldado. Ngem saan a mapunas ti saludsod iti barukongko: ania ti gagarada kadakami?

         (Maigibusto)

 

Comments are closed.