Footer

SARITA: Ti Kabarbaro a Lubong (Maikatlo a paset)

NAILUKAT ti ridaw. Ngem di pay nagbaliw ti rupa ti lubong.

“Happy birthday!” inkablaaw ni Michael ngem di nakalibas iti agongna ti kasla kais-isprey iti air freshner a salas.

“Tenkio, ninong,” mapilpilit laeng ti sungbat. Imbaltog ketdi ti ubing ti bagina iti derosas ken immaratiddog a sopa. Pinidutna ti remote control ket iniddepna ti telebision a pagbuybuyaanna itay iti  karton. Nagkukot ket dagiti imana ti nagpungananna.

Tinaldiapan ni Michael ti nangisit nga ispiker ti kompiuter a pagtataudan iti love song da England Dan ken John Ford Coley a napauluan iti “Just Tell Me You Love me.”

“Pasensiaamon. Idi pay la kalman dayta nga agmamait,” palawag ni Myla a nakamulagat iti sango ti nangisit nga LCD monitor a sumango iti amianan a semento-a-diding ti salas. Nalamiis kadagiti mata ti asul-langit a maris ti salas ken ti kusina. Iti kanawan ni Myla, ti stainless a refrigerator a dumna iti pader. Iti kanigid, divider a nakaikabilan kadagiti stuff toys ken plastic a sabsabong ken nakakakuadro a ladawan. Adda iti sirok ti telebision ti DVD player. Adda bukodna a rack ti mini-component. Naitali iti tengnga dagiti kurtina dagiti tawa iti laud a nangbaet iti ridaw ket lalo pay a nangited iti lawag iti salas kadayta agalaskuatro iti malem. Nadalus ken nasileng ti basar a puraw a tiles. Sarming ti nagtimmukel a center table iti sango dagiti de-rosas ti marisna a sopa a nagkukotan ni Junjun. Iti laksid ti nagtimmukel a lamisaan a dumna ti refrigerator idinto a paglutuan ken lababo iti laksid itoy a partision. Ti alley nga agpaabagatan ti manglabas iti paglutuan ken agturong kadagiti tallo a siled ti apartment, iti ungto ti yan ti CR, ti dirty kitchen ken ti paglabaan. Awan ti wara wenno saan a maiparbeng nga urnos. Nasabat ni Michael itay iti ruangan ti inaladan ni Nana Lourdes nga ina ni Myla nga agdardaras a mapan sadiay marketan.

“’Pay, awan met ti sangailim, balong?” nagderetso ni Michael iti nagtimmukel a lamisaan ket imparabawna ti sangagalon nga ice cream ken ti dua karton a sans rival.

“Adda insagana ni Mamang. Ice cream, salad, cake ken pansit. Ngem agmamait nga ubing. Mabusorak pay ketdin ta dina kayat nga ayaban dagiti gagayyemna,” timmakder ti ina ket kinamangna ti cabinet iti laksid ti nagtimmukel a lamisaan ket nangiruar kadagiti platito, tinedor, cup,  kutsarita, ken kaud ti ice cream nga imparabawna iti stainless a tray. Kalpasanna,  linukatanna ti refrigerator ket inruarna ti saganana a naka-tupperware. Pasaray taliawenna ti anakna a nakatallikud itan ti kukotna.

“’Maykan, balong, ta mangantayo ngaruden. Naimas ti sans rival, kunam sa!”

“Diak mabisin, ninong. Tenkio kadagita a regalom.”

“Ania ngarud ti kayatmo?”

“Diak kayat ti cake. Diak kayat ti ice cream!”

“Ania ngarud? Ibagam. Intayo ag-beach idiay La Union?” kiniddayan ni Michael ti ina. Kidday a nabayagen a dina inaramid.

“Ninong, apay a di met agawiden ni papang? Dina pay la ibaga no nagasawan iti sabali ta uray no saanen nga agaw-awid no dinakamin lab ken ni mamang! ”

Natilmon ni Michael ti katayna. Nakudkodna pay ti di met nagatel a tuktokna. Nagsabat manen dagiti mata da Michael ken ni Myla. 

“Junjun, dika kadi makaaw-awat, anak?”

“Kunam idi kalman, sumangpetto no rabii, anshi met! Sangkabagam a rabii, ngem di met sumangpet. Nagadun a rabii, anshi latta met! Ulbo-ulbodennak met isu!”

“Apay manen a kastam? Imbagak ‘garuden a sumangpetto…”

“Ket anshi met ‘garud!”

Di nailimed ti panangtilmon ni Michael ti katayna iti panagsabat manen dagiti matada ken ni Myla. Dagiti mata ti ina a kunam la no nakatanggaya nga ima a kasla agun-unnoy iti sungbat iti agdadata a parikut.

Agkataytayag da Michael ken ni Myla iti lima a kadapan ken innem a pulgada ken addaanda iti kalalainganna a pammagi. Uray no di nagaramat iti mek-ap ket lumabaga ti pudaw ken dumerosas dagiti pingping daytoy nga Igorota – manipud iti puli ti Ibaloi. Kas karaniag ti sumingsingising nga init iti mungay ti Bantay Pulag dagiti matana lalo no umisem. Nagmarka ti kayaw ti pammagina iti kumepkep a maong a pantalon nga inasmanganna iti kumepkep a nalabaga a tisiert. Agsala dagiti pagat-abaga a buokna no aggunay. Nasileng pay laeng dagiti narasay a kasla buok ti pusa kadagiti takiagna.

Ken ni Michael, manutsutil ti kumurkurikor iti panaulpapenna nga agtaud iti ina. Nagtayyek dagiti bukelbukel dagiti mata ni Michael idi kasla nangngegna a naipatangatang ti daan a kansion iti barukongna. Ngem nagari iti lapayagna ti maipatpatayab a sonata: Many times, I wish you were here/Through the velvet shadows of my dreams/Many times I wish you were near/ through the darkness as it came but it seems that you/You never said what I needed to hear/ just tell me you love … Sutil! inyikkis ti muging ni Michael. Apay ngata a daytoy a musika ti patpatokaren ni Myla? dinamagna iti bagina.

Nalidem ti rupa ni Myla a nagikabil iti dius kadagiti baso. Pinaliiw ni Michael ti naannad a panaggunay dagiti kimmandela ken lumabaga ken napipino a ramramay. Saan a nagbaliw ti kayaw ti lap-it ti immal-o a pammagi. Kayaw a kanayon idi a mangriing iti baro iti ubing a parbangon no di man mangipaay iti puyat wenno panaguper iti inna panagdigos.

       (Maituloyto)

 

Comments are closed.