Footer

Walk for peace, naisayangkat

SAN FERNANDO CITY – Nangisayangkat ti police regional office ditoy babaen ti panangidaulo ni Police Chief Supt. Romeo C. Hilomen iti “walk for peace” kas paset ti kick-off program ti pannakaselebrar ti crime prevention week.

Nangrugi ti pannagna iti plasa ditoy siudad ket naggibus iti headquarters ti PROI a nakaangayan iti misa ken pannakaingato ti bandera.

Iti panagbitlana, kinuna ni Mayor Pablo C. Ortega a kasapulan a maikkan iti pammigbig iti pannakainbolbar iti daytoy nga aktibidad agsipud iti kinapategna iti pannakalapped iti krimen.

Kinuna met ni provincial board member Dr. Joaquin Ostrea, Jr. a makikinnamayyet ti lokal a gobierno ti La Union iti pannakalapped iti krien babaen dagiti ordinansa a mangituding iti curfew hours kadagiti menor de edad.

Dinayaw pay ni Ostrea ti nainget a kampania ti kapolisan mainaig iti droga kas pinaneknekan iti pannakaraut ti maysa a laboratorio ti droga iti Naguilian.

Kinuna ni Ostrea a pammatalged daytoy nga agtrabtrabaho ti gobierno para iti pagimbagan dagiti agtutubo ket saanda nga agmaymaysa iti pannakirupak kontra iti illlegal a droga.

Impatalged ni Hilomen nga agtultuloy dagiti polis ti rehion iti pannakitinnulongna kadagiti amin nga ahensia ken organisasion para iti pannakaipromot ti natalna a Rehion I.#

Comments are closed.