Footer

EDITORIAL:HB 4580 ken 4772, discriminatory ken di nainkalintegan

Iti bukodmi a panirigan, saan a maitutop a mapagadalan ti House Bill 4580 ni Diputado Ignacio Arroyo ti Oriental Negros ken HB 4772 nga indatag ni Rep. Cynthia Villar ta saanda laeng a discriminatory in nature no di pay saanda a nainkalintegan.

Iparit ti HB 4580 kadagiti propesional a mapanda mangged iti ballasiw-taaw no saanda a makatrabaho nga umuna iti pagilian iti dua a tawen.

Discriminatory daytoy ta dagiti laeng propesional ti mapawilan. Saan sa a masirip ni Rep. Arroyo nga agsobsobran  ti bilang dagiti propesional iti pagilian. Kaadduan  kadagitoy ti awanan trabaho, part time a mangisuro kadagiti South Korean iti nababa a sueldo wenno agtrabaho kadagiti call centers.

Dagiti laengen nurses,  agsobsobradan ti bilangda ket saanda a makastrek iti trabaho. Dagiti dadduma, nasken nga agbayadda kadagiti ospital wenno agbulontarioda kadagiti pribado nga ospital tapno laeng maaddaanda  iti eksperiensa.

Maminpat nga aduan ti  bilang dagiti naggraduar a saan a nakapasa iti board. Sadino ti papanan dagitoy?

Saan sa a masirip ni Rep. Arroyo a kadagiti laengen ospital ti gobierno, nagbassitan ti sueldo dagiti nurses ta agpatingga laeng iti dies mil wenno nababba pay. Saan a maitutop daytoy a sueldo dagiti nurses ta addan ti Republic Act 9173 wenno Nursing Act of 2002 a nangituding iti sueldo dagiti nurses. Kas sagudayen ti RA 9173, nasken nga agsueldo dagiti nurses iti salary grade 15 wenno P16,093.00 iti makabulan.

Apay a saan daytoy ti tutokan ni Rep. Arroyo tapno saandan nga agpanaw iti pagilian?  Apay a saanda a mangited iti naan-anay a pagtrabahuan dagitoy a propesional tapno saanda nga agpanaw?

Iti sabali a bangir, ituding ti HB 4772 a nasken a makaipaay iti community service ti estudiante sakbay nga agreduarda iti high school ken  kolehio.

Agdalusda kadagiti parke, playground, kanal, kalsada, agmula iti kayo, ken dadduma  pay a community service.

Saan ngata a duplikado laeng daytoy iti National Service Training Program (NSTP) a kompulsario nga asignatura iti kolehio? Saan laeng a maysa a semester daytoy no di ket dua a semester ken katukadna ti tallo a units. Mapaspasamak daytoy kada Sabado ken Domingo kadagiti amin nga eskuelaan iti Pilipinas. Agpada ti gakat ken ti NSTP iti gagem ket kunami a saan a maitutop a pagdedebatean daytoy nga agbalin a linteg daytoy ta maar-aramiden iti eskuelaan ken ar-aramidenen dagiti estudiante. 

Adu dagiti mas nasisita ken importante a banag a nasken nga ilinteg. Nagadu met ti linteg a saan a maiyim-implimentar. Apay a saan a dagitoy ti kangrunaan a kitaen dagiti agilinlintegtayo? (JMA)

 

Comments are closed.