Footer

Estudiante, biktima ti Budol-Budol Gang

CANDON CITY – Maysa nga estudiante a babai ti biniktima ti Budol-Budol Gang a  nakapukawan iti kuarta, alahas ken selponna.

Nagpulong iti polis ni Marissa Lascota, 19, residente ti Barangay Baritao, Tagudin, Ilocos Sur nga inallilaw ti maysa a babai ken lalaki ket intarayda ti kuarta a kaiyayaonna iti ATM.

Segun iti biktima, kapampanawna iti RCBC idi asitgan ti maysa a babai ket nagsaludsod kenkuana no sadino ti yan ti nailubo a trak.

Madama, immasideg ti maysa a lalaki ket imbagana nga ammona ti yan ti nasao a trak.

Segun iti biktima, kiniddaw ti babai a kuyogenna a mapan iti trak ket impaiggemna ti maysa a bag a naglaon kano iti kuarta.

Kinuna ti biktima nga innala ti babai ti kuentas, singsing ken selponna kas seguridad iti impaiggemna a bag idinto nga intedna ti ATM cardna a nakaisigpitan ti inyaonna a kuarta iti lalaki.

Saan a maipalawag ti biktima no apay a naglaka a naawis dagiti suspetsa a mangiyawat iti kuarta, alahas ken selponna.

Imbaga kano dagiti dua nga agsublida ket agsasarakda iti Mister Donut.

Nagbalaw ti biktima idi saan metten nga agparang dagiti dua ket idi linuktanna ti bag, nasukalanna a pappapel laeng ti naggianna.

Saanen a nabirokan pay dagiti polis dagiti dua a suspetsa.#

Comments are closed.