Footer

Gasoline station, natakawan iti tengnga ti aldaw

VIGAN CITY – Natureden dagiti mannanakaw ta isayangkatdan ti dakes a panggepda iti tengnga iti aldaw ken lugar a pagas-assisawan dagiti tattao ken luglugan.

Iti katengngaan ti aldaw ti Septiembre 8, dua a lalaki ti nangsibbarut iti kahon a nakaikabilan ti naglakuan ti maysa a paggasolinaan ditoy sada nagpayasyas a naglibas iti daya a direksion.

Iti panagpalutpot dagiti polis ditoy ken ni Antonio Viernes, gasoline boy, insardeng  ti dua a lalaki ti luganda nga XRM iti asideg ti Caltex Gasoline Station a masarakan iti Liberation Boulevard, kasla awan aniaman nga immasidegda iti gasoline stand, ginammatan ti kahon a nakaikabilan ti naglakuanda, sada sipapardas a limmugan iti motorsikloda ket payasyas a naglibasda iti daya a direksion.

Naammuan a P31,150.00 ti kadagupan ti naglakuan ti gasolinaan nga intaray dagiti di pay nabigbig a mannanakaw.

Nagresponde dagiti polis ket sinawar ken nagipatulodda iti flash alarm kadagiti kabangibangda a police stations ngem saanda a nasapulan dagiti mannanakaw.

Nabigbig ti maysa kadagiti suspek a ni Jose Pepito Cachola, residente ti Nagbukel, Ilocos Sur babaen dagiti retrato nga impakita dagiti inbestigador iti gasoline boy .

Natakuatan a sumangsango ni Cachola iti kaso a frustrated murder iti Vigan a naipila iti city prosecutor’s office.#

Comments are closed.