Footer

P3-B Australian aid, iti laeng Mindanao ti konsentrasionna: LPP

CABUGAO, Ilocos Sur – Umab-abot iti P3 bilion iti tinawen ti tulong manipud iti Australia ngem iti laeng Mindanao ti konsentrasionna.

Daytoy ti kangrunaan a natratar iti taripnong ti liga dagiti gobernador a pakairamanan ni Ilocos Sur Governor Deogracias Victor “DV” Savellano  a naangay  babaen ti awis ti gobierno ti Australia idi Agosto 25-29.

Ni Savellano ti agpapaay kas Vice President for Northern Luzon iti League of Provinces of the Philippines.

Segun ken ni Savellano, ditoy nga inadal ti liga dagiti gobernador  no apay nga iti Mindanao laeng ti konsentrasion ti nasao nga Australian aid program.

Naammuan iti taripnong a ti gobierno nasional ti mangidikdikta no ania a luglugar ti pakaiturongan ti tulong base iti ebaluasion ti National Economic and Development Authority.

Iti kaunaan nga interview ti media ken ni Gob. Savellano kalpasan ti isasangpetna manipud Australia, kinunana nga agsasangonto pay maminsan dagiti gobernador tapno ammuenda dagiti procedures a maar-aramid iti evaluation ti NEDA kasta metten a kasangodanto dagiti mangtartarawidwid iti Australian aid program tapno ipresentarda dagiti programada a mabalin a sumrekan ti gobierno ti Australia.

“Ipadastayo laeng bareng no matulongandatayo saan laeng a ti Mindanao no di pay ti Amianan a pakairamanan ti probinsiatayo nga Ilocos Sur,” kinuna ti gobernador.(Mancielito S. Tacadena/NBN Vigan)

Comments are closed.