Footer

PITIK: Etika ti pagkamtudanda

Iti desisionna itay nabiit, imbilin ti Korte Suprema ti pannakaikkat ni Court of Appeals Vicente Roxas kas hues gapu iti grave misconduct, dishonesty, undue interest ken conduct prejudicial to the best interest of service. Binutosan pay ti Nangato a Pangukoman a ma-forfeit amin a benepisiona iti panagserbina iti gobierno.

Malaksid ken ni Roxas, dinusa pay ti Korte Suprema da Jose Sabio, Jr., Bienvenido Reyes, Conrado Vasquez ken Myrna Dimaranan-Vidal.

Dua a bulan nga awan sueldona ti dusa ni Sabio, “nakaro nga unget” ti naited kada Vasquez ken Reyes ken naballaagan laeng ni Vidal.

Saantayon a dakamaten ditoy ti nanipudan ti dakkel nga isyo ti alegasion ti panagpasuksok kadagiti CA justices. Ngem nairagpinda iti riri iti nagbaetan ti dua a higante a korporasion. Riri daytoy no asino ti mangkontrol iti Meralco, maysa a higante a korporasion ti elektrisidad.

Ipangrunatayo ditoy ti garaw dagiti justices ti Court of Appeals a mapaliiw a saan a maikanatad ken saan a rumbeng nga aksion dagiti madaydayaw a kameng ti CA a nakaikawesan ti turay a mangkita iti nalinteg, nadalus ken patas a pannakaipatungpal dagiti paglintegan iti pagilian.

Kas ken ni Roxas, napudasdasan a nangaramid iti desision a pabor iti Meralco iti baet nga awan ti deliberasion iti nagbabaetan dagiti mahistrado. Naduktalan pay a pinagparang lattan ni Roxas nga adda napasamak a deliberasion a nagbatayanna a mangipaulog iti pangngeddeng a pabor iti korporasion ti elektrisidad.

Nadagsen daytoy nga inaramid ni Roxas. Nagtured la ketdin a nagaramid iti desision nga awan ti deliberasion dagiti kameng. Saan a nakapappapati nga aramiden daytoy ti maysa a masirib a hues, mararaem ken maibilang a panuli ti kinalinteg ken hustisia.

Masaludsod ngarud: Ania ti dakdakkel a kagagapu no apay a nagaramid ni Roxas iti maysa a banag nga ammona a mailabsing iti paglintegan ken maikontra iti kinataona a kas hues a rumbeng a mangsalaknib iti linteg?

Naruay dagiti milion-peso a saludsod nga agay-ayuyang iti panunot dagiti umili. Ngem agpatingga lattan a suspetsa ta nakiro dagiti pasamak. Kiniro dagiti masirib nga abogado. Nalilibeg ti lilibeg tapno saanen a mapagsasaip ti pudpudno a napasamak.

Ngem aniaman nga agay-ayuyang iti panunot dagiti umili, maymaysa a tao laeng ti makasungbat. Ni laeng Roxas ti tulbek iti sungbat kadagita a saludsod!

                – – – – –

Ayonanmi ti desision a maikkat ni Roxas ngem saankami a kontento iti desision a masuspenso laeng ni Sabio iti dua a bulan ken maungtan laeng da Vasquez, Vidal ken Reyes.

Mamatikami a rumbeng laeng a nadagsen ti naited a pannusa ken ni Roxas ta  linteg ti linteg. Awan ti nangatngato ngem iti linteg. Naglabsing ni Roxas ket rumbeng laeng a sagrapenna ti nagbasolanna.

Ngem mamatikami a maysa laeng a sipat iti pungupunguan ti impakat ti Korte Suprema kadagiti dadduma a CA judges, nangruna unay ken ni Sabio.

Apay a makunami dayta?

Iti panagpalutpot ti panel a tinudingan ti Korte Suprema a mangkutkot iti pudpudno a napasamak mainaig iti kontrobersia a nakaisawsawan dagiti CA justices, napudasdasan a tinawagan ni PCGG chairman Camilo Sabio ti kabsatna a justice ket mapapati a kiniddawna iti namindua a beses a paboranna ti GSIS iti kaso nga impilana maikontra iti Meralco.

Ti makapadagsen, saan nga impalgak ni Justice Sabio daytoy a napasamak ket sana la nadakamat idi limtuad dagiti alegasion a pinadas ti maysa a negosiante a pasuksokan.

Maikontra iti etika nga umawat ti maysa a hues iti kiddaw (ken ti karaipna a maited a konsiderasion) manipud pay met iti kabsatna a (maibilang nga asideg iti agdama nga administrasion ken kasupanget dagiti agtuturay ti ABS-CBN nga akinkukua iti Meralco). Rumbeng laeng a nag-inhibit koma ni Sabio gapu ta maipit metten iti nagbaetan ti dua a bato: ti dayaw ti puestona ken ti kinapateg ti maysa a kabsat. Iti panagulimekna, impaneknek ni Sabio a nadagdagsen ti bukodna a dara ngem iti linteg ti pagilian.

Ti makapadakes, awan ti makita dagiti agkabsat a dakes iti inaramidda. No kastoy ti panagpampanunot dagiti dua a Sabio, maysa a nasiglat nga abogado ken maysa a hues, ania ti klase ti hustisia ti namnamaen dagiti ordinario a tattao iti pagilian?

Makunami: iti daytoy nga inaramid ni Court of Appeals Justice Sabio, rumbeng laeng a kas kadagsen ti pannusana iti naipakat ken ni Vasquez .

Ngem suspenso laeng iti dua a bulan idinto nga adda pay ordinario nga umili a nabalud iti mano a tawen gapu iti panagtakawna iti sangkabassit a gatad iti ikutna. Ah, ngem sabsabali dagiti Sabio.  Sabsabali ti hustisia para kadakuada! Wen, onli in da Pilipins!#

 

Comments are closed.