Footer

Suspetsa a pimmatay iti polis, nakemmeg iti Baguio City

BAGUIO CITY – Natnag iti ima dagiti pannakabagi ti linteg ditoy ti maysa a suspetsa iti pannakapapatay ti maysa a polis iti Vigan City idi kanikapat a tawen ti napalabas.

Kinemmeg dagiti operatiba ti Criminal Investigation and Detection Group (CIDG) Cordillera ken Bulacan nga indauluan da SPO3 Ernesto de Gula Jr. ken SPO2 Teofilo Juanata Jr. ni Joel Batuon Arcena, 24, baro, taga-San Julian Norte, Vigan City, Ilocos Sur  ngem agnanaed iti Km 4, La Trinidad, Benguet bayat ti pannakisinnarakna iti textmatena a dina ammo a police informant iti 6:30 ti bigat ti Septiembre 6 iti Burnham Park ditoy.

Kinuna ni Senior Supt. Cedrick Train, regional chief ti CIDG iti Cordillera a ni Batuon ti kangrunaan a suspetsa iti pannakapapatay idi 2004 ni SPO Eugenio Feredo iti uneg ti Grandpa’s Inn iti Vigan City.

Kalpasan iti pammapatay, maatap a naglemmeng ti suspetsa iti Km 4, La Trinidad, Benguet.

Karaman ti suspetsa iti lista ti DILG a most wanted persons iti pagilian ket addaan iti patong iti ulona a P140,000 a gunggona, segun ken ni Train. 

Naaresto ni Arcena babaen ti warrant of arrest nga inyisio ni Judge Dominador Arquelada ti Vigan Regional Trial Court, Branch 21 gapu iti kaso a murder a naipila maikontra iti suspetsa.

Nangrugi ti surveillance operation ken ni Arcena idi Marso daytoy a tawen kalpasan a nagbalin daytoy a textmate ti maysa a babai nga informant ti CIDG a nagpammarang a baknang a babai a taga-Zambales.

Kinumbinsi ti informant ni Arcena nga agkitada iti panagbakasionna iti Baguio City iti Setiembre 6 tapno adda kaduana nga agpasiar.

Insandi ti CIDG regional office ni PO1 Charito Carandang Leo nga agpammarang a textmate ni Arcena tapno saan a maipasango iti peggad ti informant.

Idi sumangpet ni Arcena iti naitulag a pagsarakanda iti informant iti Burnham, dagus a kinemmeg dagiti operatiba.

Iti pannakaisurat daytoy, naipaiman ni Arcena iti Vigan City police tapno sanguenna ti kaso a murder maikontra kenkuana.#

Comments are closed.