Footer

Chavit, dadduma pay a naglabas nga opisial ti Vigan, mapadayawan iti Legislators Week celebration

VIGAN CITY – Manamnama nga idauluan ni dati a Gov. Luis “Chavit’ Singson dagiti maikkan iti pammadayaw nga opisial a nagserbi iti daytoy a siudad kadagiti naglabas a tawen.

Segun ken ni Vice Mayor Franz Ranches, maited ti parangal  kadagiti amin a legislators inton Septiembre 26 nga agserbi metten a homecoming dagiti naglabas a nagtakem nga opisial ditoy a siudad kas tampok ti selebrasion ti Legislators’ Week a maangay iti Septiembre 22 agingga iti Septiembre 26.

Nagpaay a hepe ti polis ni Singson sa konsehal iti Vigan sakbay a nagserbi a gobernador ti probinsia ken diputado iti umuna a distrito.

Itay nabiit, dinutokan ni Pres. Gloria Macapagal-Arroyo ni Singson a Deputy National Security Adviser.

Dagiti sumaganad dagiti aktibidad iti daytoy a selebrasion:

Sept. 22: 8 a.m. – maisayangkat ti parada iti aglikmut iti siudad a pakipasetan dagiti amin a konsehal;  2 p.m. – maaramid ti  book launching ti Vigan Transportation Code iti ABC Hall a pakaimbitaran dagiti amin a presidente ti TODAs, traffic aides, ken dadduma pay a sektor.

Sept. 25: 6 p.m. – maigannuat ti signing ceremonies ti Conservation Code iti Casa Salcedo (dati a Tan Pue Sia building) nga atenderan dagiti amin a homeowners ken miembro ti Vigan Tourism Council.

Sept. 26:  maisayangkat ti  Parangal wenno Homecoming kadagiti amin a former legislators ken maipaayan iti pammadayaw dagiti amin a nagserbi iti siudad kadagiti naglabas a tawen a pakaibilangan ni Singson.

Kangrunaan a panggep ti selebrasion ti pannakaited iti  kaipapanan dagiti nabutosan a mammanday-linteg.#

 

Comments are closed.