Footer

Pagtagilakuan iti abalbalay, natakawan

BAGUIO CITY – Sinerrek dagiti mannanakaw ti maysa a pagtagilakuan ti abalbalay iti SM City ditoy ket kinasakasda dagiti ay-ayam nga agpateg iti ginasut a ribu a pisos.

Nagreport iti polis ni Ma. Aurora Rodriguez Collado, 26, balasang, agnaed iti Valenzuela St., Barangay Salud Mitra, ditoy siudad a natakawan ti Toy Kingdom ket intaray dagiti di pay am-ammo a mannanakaw dagiti abalbalay  a pakairamanan ti 4 units ti Game Boy Micro, 2 units ti MD Station Lite, 4 units ti Bubble Plaster, 6 units ti Game Boy Advance, ken maysa a Value Pack nga agpateg amin iti P316,089.25.

Natakaw pay ti maysa a GP 2000 handheld radio ken maysa a  GP 308 handheld radio transceivers nga agpateg iti nasurok a  P30,000. a naala manipud iti Eagle Matrics Security Agency, a nangipuesto kadagiti guardia iti nasao a lugar.

Madama ti panagpalutpot dagiti polis no kasano a nakastrek dagiti mannanakaw iti pagtagilakuan iti baet iti nainget a seguridad.

Mapapati a nakastrek dagiti mannanakaw iti pagtagilakuan babaen ti panagaramatda iti improvised a tulbek.

Iti inisial nga inbestigasion ti bunggoy ti Scene of the Crime Office (SOCO), awan ti pakakitaan a  naporsar a naluktan ti  ridaw ti pagtagilakuan.#

Comments are closed.