Footer

Panagaramid iti organiko a ganagan, agkurkurang ti impormasion: mayor ti San Juan

SAN JUAN, Ilocos Sur – Kinuna ti mayor daytoy nga ili a ti kinakurang ti information dissemination maipanggep iti panagaramid ken panagaramat iti organiko a ganagan ti gapuna no apay a mabilbilang laeng dagiti mannalon a maguyugoy nga agaramat itoy.

Kinuna ni Mayor Benjamin Sarmiento bayat ti opening program ti tallo nga aldaw a Training-Workshop on Organic Farming a naangay iti BARang-ay demo farm idi Setiembre 11 nga awan ti serserbi dagiti trainings nga at-atenderan dagiti municipal agriculture officers no saanda met a maiyadal kadagiti mannalon a kangrunaan a mangusar kadagiti kabaruanan a teknolohia.

“Nalaka ti agaramid iti organiko a ganagan ngem maulit-ulit dagiti kakastoy a seminar gapu ta awan met ti mannalon a mayat nga agaramid agsipud ta di  dumanon kadakuada dagiti impormasion.” kinuna ni Sarmiento.

Kanaig daytoy, kinuna ni Gob. Deogracias Victor Savellano a panawenen tapno sublian dagiti mannalon dagiti kannawidan a wagas ti panagtalon dagiti appo a lallakay.

Kinunana a nupay agpayso a nanamnam-ay ti agusar iti inorganic fertilizer,  daytoy ti nakaigapu iti pannakapukaw dagiti sustansia ti daga malaksid a makaipaay pay iti sakit dagiti nateng a naganaganan iti kastoy a klase ti abono.

“Rumbeng a committedtayo amin tapno maiyimplimentar a nasayaat dagiti kastoy a programa ti gobierno para iti pannakapasayaat ti agrikultura,” innayon ti gobernador.

Indawat pay ti gobernador a masapul nga aggapu iti probinsia dagiti raw materials a maaramat iti panagaramid iti organiko a ganagan tapno ti laeng labor ti puonan.

“Masapul a saantayon a gatangen iti sabali a lugar ti maaramat ta no kastoy met laeng ti mapasamak, nangina latta ti mapartuattayo,” kinuna pay ni Savellano. 

Kabayatanna madama nga ipagpagna ti provincial government ti pannakaakreditar ti BARang-ay kas agri-tourism demo farm.

Kinapatangen ti gobernador dagiti mannalon iti aglawlaw ti demo farm a makitipon iti BARang-ay  tapno masupusopan ti 10 ektaria a pagkurangan ti demo farm ta kasapulan a 26 nga ektaria kalawana tapno maakreditar daytoy.

Kinuna ti gobernador a babaen iti daytoy nga addang, matulongan pay ti gobierno probinsial dagiti mannalon iti pannakailako dagiti produktoda

Naipasdek metten ti Farmers Information and Technology Services (FITS) Center iti lugar babaen ti pannakitinnulong ti Department of Agriculture ken Ilocos Agriculture and Resources Research and Development  Consortium (ILARRDEC). Agpaay daytoy a sentro a mangipaay iti  impormasion  kadagiti mannalon mainaig kadagiti kabaruanan a teknolohia iti panagtalon.#

 

Comments are closed.