Footer

SALAYSAY: ITI INDAYON NI LAGIP: Adda Naituding a Kaikarian (Maudi a paset)

Iti panagtrabahok iti barko, naadak dagiti nadumaduma a puerto iti Visayas ken Mindanao a pagsangladan ti luganmi. Saan gayam a maatiw ti pagiliantayo iti natural a kinapintasda, Manong Danny.

Pinaginanak ni tatang iti talon. Binulan a paw-itak iti sustentona.

Pinadasko ti nagaplay iti Celebrity Cruises. Kalpasan ti makabulan, adda pakaammo nga agreportak iti Celebrity Cruises. Imbagada nga isubmiterko dagit orihinal a papelesko. Nagbakasionak iti trabahok tapno isaganak dagiti papelesko. 

Kalpasan ti makabulan, nakaawatak iti tawag a mangrugiak nga agtrabaho iti MV Horizon, maysa a barko ti Celebrity Cruises. Maysa met laeng pampasahero a barko a kas iti dati a nagtrabahuak.

Adda pannakaikawak idi damok iti baro a trabahok ta manmano ti masarakak a padak a Pinoy. Naistrikto dagiti superiorko. Bassit la a kamali ket maungtannak. Ngem adayo nga amang a nasaysayaat daytoy pagtrabahuak ta malaksid a dakdakkel ti sueldok, naadakak pay dagiti ganggannaet a pagilian a diak pulos ninamnama a mabaddekan.

Dimmakkel ti naipaw-itko a kuarta ken ni tatang, Manong Danny.

Kalpasan ti walo a bulan a kontratak, nagsubliak ditoy Pilipinas. Napalalo a ragsak ti amak a nakakita kaniak. Kinunana a dakkel  ti nagbaliwan ti pammagik.

Naragsak met dagiti barkadak nga immay nangsarabo kaniak. Pinainomko ida iti naingel nga arak nga inrantak nga inyawid para kadakuada.

“Talaga nga asensokan, g’iem,” kinuna ti maysa a kapatadak.

“Suerte laeng, g’iem,” insungbatko.

Kalpasan ti dua a bulan a bakasionko, adda naawatko a mensahe nga agreportak iti trabahok. Iti MV Infinity, sabali a barko ti Celebrity Cruises ti pagtrabahuak. Dakdakkel daytoy ngem iti immuna a barko a nagtrabahuak. Agdaliasat daytoy iti nadumaduma a paset ti Atlantic Ocean ken iti Pacific Ocean. Agkarga met laeng kadagiti pasahero ken turista a mapan iti sabali a pagilian ken isla.

Adda pay gundaway a napankami iti Hawaii. Nagbayagkami ditoy ta agsublisublikami kadagiti nadumaduma nga isla ti Hawaii. Magustuan dagiti turista a pasiaren dagiti naipattopattok nga isla a pakasarakan kadagiti napanayag a buya ti nakaparsuan. Wen, Manong Danny, adu dagiti ganggannaet a pagilian a naadakak. Kaarigko ti turista nga agalla-alla kadagiti nadumaduma a pagilian.

Tapno maliwliwa ti amak, inggatangak iti motorna tapno adda paglugananna. Ngem nadamagko a makaadayo metten ni tatang nga agpasiar. Makadanon payen iti estasion ti radio DZTP iti Candon City. Kunada nga adu kano metten ti gagayyemna a chicks ngem diak patien ta saan a naguapo ni tatangko. Itarayan la ketdi dagiti babbai no agdaton kadakuada. Ngem ala, binay-ak lattan ni tatang no dayta ti pagragsakanna. Panawen metten a sagrapenna ti nam-ay a naipaidam kenkuana iti napalabas.

Babaen ti kaasi ti Apo a Namarsua, naragpatko met laeng ti balligi nga inarapaapko iti biagko. Ngem akuek a diak koma nagun-od ti balligi no awan dagiti tattao a di agpangadua a tumulong iti padada a tao. Diakto makasubsubalit ken ni Heneral Villanueva ken ti junior officerna a nangtulong kaniak iti iseserrekko iti pagtrabahuak a barko. Dakkel unay nga utangko a naimbag a nakem kadakuada iti daytoy agdama a sasaadek iti biag.

Ditoyen ti paggibusan ti pakasaritaan, Manong Danny. Agyamanak la unay iti anusmo a nangibasa daytoy a suratko. Adtoyak a mangibati ti naimbag a malemyo amin a padapada nga awan ti labasna. Ni Apo Dios ti adda koma kadatayo.

              ‘toy nagsurat,

            Franco 

                       Pattiqui, Santa Cruz,

                          Ilocos Sur

 

Comments are closed.