Footer

11 naitawtaw a mangngalap, naalaw

SAN ESTEBAN, Ilocos Sur – Inarayat ken intakdang dagiti residente ditoy ti dua a mangngalap a nagkatangkatang iti taaw iti dua nga aldaw ken maysa a rabii.

Napalalo a yaman dagiti agkayong a da Dominador “Sonny” Darang, 32, ken Jeffrey Grycochea, 29, gapu iti panangarayat kadakuada dagiti residente nga agnaed iti igid ti baybay ditoy ken iti pannakaispalda kalpasan a naitawtawda iti baybay gapu iti Bagyo Nina.

Dagus a naiyawid dagiti dua iti denna dagiti pamiliada.

Kabayatanna, nakaawiden dagiti siam a mangngalap a naitawtaw iti taaw gapu iti Bagyo Nina.

Immuna a naipadamag a walo laeng dagiti mangngalap ti nakasubli iti pamiliada iti Barangay Bucayab, Bauang, La Union ta mapukpukaw ni Carlos Cuello, 46, ngem insalakan dagiti residente ti Barangay San Carlos, Caba, La Union.

Segun ken ni Darang, alas-4 ti parbangon ti Setiembre 21 idi agpataawda ta awan met ti nakitada a seniales ti dakes a panawen.

Ngem iti ala una ti malem, bigla lattan a nagangin iti napigsa. Nagawid dagiti padada a mangngalap ngem nagbati dagiti dua.

Kalpasan ti maysa pay nga oras, bigla lattan a nagiddep ti 16 horse power a makina ti bilogda ket saandan a nakontrol ti luganda nga iturong iti floater ti rama.

“Naimbag ta impaigidnakami dagiti dalluyon agingga a nakakapetkami met laeng iti naig-igid a rama a nangigalutanmi iti bilog,” palawag ni Dominador.

Kinuna ni Grycochea a damoda a mapadasan ti agkallautang iti taaw.

“Ti aggaud ken lammin ti nangparigat ken nangpakapsut kadakami,” innayon ni Grycochea.

Nagyaman ni Grycochea ta nupay napakapsutanda a naggaud, awan ti sugatda nga agkayong.

Kinumpirma ketdi dagiti agkayong a nupay addan madi a padasda iti inda panagkalap, tumapogdanto latta nupay agsakbaydan no adda bagyo a madamagda.#

 

Comments are closed.