Footer

EDITORIAL:Saan a maikanatad nga armasan ti sibilian

Ti sibilian ket sibilian latta uray maysa nga opisial iti barangay. No agikut man iti armas, aramtenna laeng a pangsalaknib iti bagina. Saan a maikanatad nga agikut iti armas tapno aramatenna iti pannakatagiben ti urnos ken talna iti sakupna a barangay.

Isu a dimi kanunongan ti mapaspasamak a pannakaiwaras iti paltog (shotgun ken cal.45) kadagiti kapitan iti Pangasinan babaen ti PNP. Ne, adda kadi gubat wenno dakkel a riribuk a mapaspasamak ti Pangasinan ta maarmasan dagiti kapitan ti barangay? Apay, battle zone kadi ti Pangasinan? Nakaro kadi ti pangta ti biag kadagiti kapitan iti Pangasinan tapno mangalada iti armasda?

Baliktadsan ti mapaspasamak! Narigat a patien ngem adu dagiti  polis nga awan ti armasna. Adda paltog ti sibilian nga opisial ti barangay ngem awan kadagiti pulis? Maarmasan dagiti sibilian nga opisial ngem agkurkurang iti armas dagiti mangay-aywan iti urnos ken talna? Saan a kadi a maibilang a saan a maikanatad a panangbusbos iti buis dagiti umili ti panangarmas kadagiti kapitan ti barangay?

Sibilian latta dagiti kapitan, uray opisialda iti barangayda. Iti panangited a mismo ti PNP iti paltog kadakuada,  kaipapananna ti panangipalubos kadakuada nga aramatenda dayta a paltog a pumatay. Ta dayta met laeng ti rason ti kaadda ti paltog, pumatay. Saan maikanatad daytoy. Napukawen ti kaipapanan ti hustisia no kua.

Agsipud ta adda armas ti sibilian a kapitan, saan ngarud a natalged dagiti sibilian nga agnaed iti barangayna. Ta amangan no aramaten ti kapitan ti paltog kadagiti abusado a sibilian a kalugaranna. No mapasamamk dayta, nakarkaro ti ipaayna a buong ti ulo iti PNP ta isuda a mismo ti nangiwaras kadagitoy a paltog.

Iti napalabas, adda pasamak a dinangran dagiti nakaarmas nga opisial ti barangay ti kalugaranda. Kas iti  panangpaltog dagiti nabartek nga opisial iti maysa a sibilian nga awan basolna iti ili ti Bani idi napan a tawen. Saan a masasaan a di maulit daytoy.

Naulimek ti Pangasinan. Saan a kas iti Mindanao a yan ti gubat. No maipanggep iti insurhensia, nakapsut latta a rason ti panangarmas kadagitoy a kapitan. Ta ania koma ti maaramidan ti maysa laeng a shotgun wenno cal. 45? Iti panangarmas kadagitoy a kapitan, kaipapananna kadi a saan a kabaelan ti AFP ken PNP a pukawen no di man kontrolen laeng ti insurhensia? Kayatna kadi a sawen a dagitoy a kapitan ti ipasungalngal ti PNP kadagiti NPA?    

Itoy a pananagiwaras iti paltog kadagiti kapitan,  naipasidongda iti peggad. Ti peggad a dina met inaramid. Ti peggad a dina maliklikan. No saan a  sumango iti kaso, maraut.

Maisubli koma dagitoy a paltog iti PNP ket itedda laengen kadagiti awanan pay armas a kamengna ta isuda ti addaan iti dakdakkel a karbengan nga agikut iti armas.#

 

Comments are closed.