Footer

Ingatngatomi ti kalidad ti panagserbi: mayor ti Tagudin

TAGUDIN, Ilocos Sur – Kinuna ti mayor ditoy nga ad-adda manen a maitandudo daytoy nga ili iti panangited ti sangguniang panlalawigan ti pammadayaw kenkuana.

Maysa a resolusion ti impasa ti provincial board bayat ti sessionda itay Septiembre 24 a maikkan ni Mayor Roque Verzosa, Jr. iti pammadayaw gapu iti panangpili kenkuana ti Civil Service Commission a pakaitedan ti PAG-ASA Award para iti daytoy a tawen.

Inawat ni Verzosa ti nasao a pammadayaw manipud ken ni Pres. Gloria Macapagal-Arroyo iti seremonia a naangay iti Malakaniang itay Septiembre 19.

Iti immun-una nga interbiona iti media, kinuna ni Verzosa a nagun-odna ti pammadayaw gapu iti napintas a pannaka-manehar ti ilina manipud idi inrusatna ti Agpiarkam Siglatmo Agsangsangkamaysakam Panagrang-aymo Tagudin (ASAP Tagudin) ken panagbalinda a self-reliant itoy  a panawen nga agrigrigat pati ti gobierno nasional.

Ni Verzosa ti kaunaan a mayor iti Region I nga immawat iti kastoy a pammadayaw manipud rinugian nga ited ti CSC daytoy agtinawen a pammadayaw idi 1962.

Karagpin ti pammadayaw nga ipaay ti sangguniang panlalawigan ti pannakited kadagiti proyekto nga aggatad  iti maysa a milion iti Tagudin.

“…Nasayaat la unay no adda maitedda a kasta a kantidad para iti pagsayaatan ti Tagudin,” kinuna ni Verzosa idinto nga innayonna a kasapulan ti pondo dagiti proyektona nga economic enterprise ti ili ken dadduma pay a proyekto ken programa ti ASAP Tagudin nga isu ti mangitandudo iti ilida.

Kinuna ti mayor nga adu dagiti deserving mayors a mabalin a maikkan iti kastoy a pammadayaw ngem ti laeng problema, saanda nga ilaban wenno isalip daydiay a programada idinto nga inyunay-unayna nga “agserbi koma daytoy a karit” kadagiti kakaduana a mayor para iti panagprogreso ti Ilocos Sur.

Kinuna pay ti mayor nga iti baet ti pannakapadayawna, awan ti pagbaliwan ti panangiturayna ket surotenna latta ti programa nga inrugida iti Ledac idi 2007 idi karugrugina ken ti flagship program nga economic enterprise.

“Kasta met nga al-aluadanmi ti panangidaulomi iti panangituraymi iti Tagudin tapno nasayaat latta, epektibo latta ken madanonmi dagiti tulong a kayat a maidanon kadagiti constituentmi iti ili ti Tagudin,” kinuna ni Verzosa.

Kinuna ti mayor nga ingatngatoda ti kalidad ti panagserbida nga agtuturay ita ta maysadan a national awardee.#

 

Comments are closed.