Footer

OPINION: Namurumor dagiti problema ti Edukasion (Maudi a paset)

Iti sanguanan dagitoy a problema, ania met ti ar-aramiden ti gobierno nangruna ti Department of Education tapno maawisna dagiti ubbing nga agsubli iti pagadalan?

Ngimmato ti budget nga inlatang ti gobierno para edukasion. Nagbalinen a P149 bilion ti budget ti DepEd para iti 2008.

Ngem iti biangmi, saan nga umdas dayta. Iti dayta a budget, dandani laeng mapan iti sueldo dagiti mangisursuro ken dagiti personnel ti DepEd ti budget.

Ngem yan ti paitna, nababa latta ti sueldo dagiti mangisursuro no maidilig kadagiti empleado nga adda iti pribado a sektor. Dayta ti gapuna nga agprotesta payen dagiti mangisursuro gapu iti kapaliiwan a nabaybay-anda no maidilig kadagiti padada nga empleado. Dayta ti gapuna nga adu a nalalaing ken makabael a mangisursuro ti mapan agtrabaho iti ballasiw-taaw, uray saanen a maestra wenno maestro no di ket caregiver, domestic helper ken dadduma pay a nababa a panggedan ngem mangited iti dakdakkel a sueldo ngem iti masapulanda ditoy pagilian.

Iti sabali a bangir agpayso, ngimmato ti budget ti DepEd ngem nababa daytoy no maidilig kadagiti budget nga ilatlatang dagiti gobierno dagiti kabangibangna a pagilian. Adu ti pakaatiwan ti budget ti DepEd a kasapulan ken rumbeng koma a maited tapno ad-adu dagiti gastuenna para kadagiti pasdek, libro, lamisaan, tugaw ken dagiti ramramit dagiti mangisursuro.

Kas solusion iti malnutrision ken bisin a problema dagiti napanglaw a lugar, inrusat ti DepEd ti school school feeding program. Tapno ad-adda nga epektibo ti programa, inlista ti ahensia dagiti luglugar a kakaruan iti kaso ti malnutrision tapno dagitoy ti prioridad a maisayangkat iti school feeding program.

Ngem iti panagkitami, band-aid solution laeng daytoy. Kalpasan ti sumagmamano a bulan a pannakaipakat ti programa, agsardengton. Pagtungpalanna, agsublinto met laeng a malnourished dagiti ubbing a benepisario iti nasao a programa iti sumagmamano a bulan.

Ad-adda a mamatikami a mapukaw ti malnutrision no mangpaadda ti gobierno iti ad-adu a panggedan para kadagiti marigrigat. No adda natalged a panggedan dagiti nagannak, manamnama a nalablabon dagiti taraon a maidasar iti lamisaanda, maaddaanda iti busbosen para iti panagadal dagiti ubbing ken ad-adda a maigaed dagitoy ti agbasa no adda naglaon iti boksitda.

Malaksid iti panggedan, ipinget koma ti gobierno ti pannakaipakat ti responsible a panagpamilia. Kas mapaliiw, ad-adda a dagiti marigrigat ti addaan iti dakdakkel a bilang dagiti annak, banag a nalapdan koma no naipasagepsep kadakuada ti kinapateg ti panangtimbeng iti annak.

Saan a malibak a maysa ti pagiliantayo kadagiti kadarasan nga umadu ti popula-sionna. Pammaneknek daytoy a saan a nagballigi ti family planning program ti gobierno.

Kasapulan a rebisaren ti gobierno ti agdama a direksion ti programana iti panagpamilia. Masapul nga akuenna a napaay ti natural a wagas a panangtimbeng iti bilang ti pamilia a pabpaboran ti simbaan a masurot. Masapul nga ipakatnan ti kontraseptiba ken dagiti artipisial a wagas a pananglapped iti sikog, uray saan a kanunongan daytoy ti Simbaan.

Sangkakuna ti Simbaan a mailabsing iti linteg ti Dios iti panagaramat iti kontraseptiba ken dadduma pay nga artipisial a panglapped iti sikog. Mabalin a pudno dayta. Ngem iti panagkunami, dakdakkel a pagbasolan iti Dios no saan a maipaay dagiti nagannak kadagiti annakda dagiti rumbeng koma a lak-amen dagitoy iti biag. Saan a rumbeng a maiyanak ti maysa nga ubing tapno laeng agkaradap iti kinapanglaw, bisin ken maipaidam kenkuana dagiti kasapulanna a kalasag iti pannakibakalna iti biag.

Ken apay a ti Simbaan ti mangdiktar iti gobierno iti programana iti panagpamilia?

Namurumoran iti problema ti Edukasion gapu kadagiti saan band-aid solution a programana a mangrisut kadagitoy ken iti saan a naballigi a programa ti turay iti panagpamilia, panagparnuay kadagiti panggedan ken dina panangited iti dakdakkel a pondo para iti edukasion tapno maguyod dagiti marigrigat nga ubbing a sumrek iti pagadalan a saan ketdi nga addada iti langalang nga agsapsapul iti pangsilpoda iti biagda.#

 

Comments are closed.