Footer

Agricultural equipment, serbisio iti salun-at impaay ti KABSAT outreach program iti Suyo

SUYO, Ilocos Sur – Agduduma a ramit iti talon ken dadduma pay a kasapulan dagiti walo a barangay ti ili a Suyo ti personal nga inyawat ni Gob. Deogracias Victor “DV” Savellano babaen ti programana a Kakailian nga Agnaed iti Barangay Sangsangkamaysa nga Agrang-ay Tayo (KABSAT) Outreach Program itay Setiembre 29.

Karaman kadagiti inwaras ni Savellano ti kuliglig, hand tractors, hose, computer sets, diesel ken gasoline pumps, mini cono, knapsack sprayers, kitchen utensils, O.B. bags, seed bags ken G.I. pipes para iti Barangay Urzadan, Patoc-ao, Cabugao, Baringcucu-rong, Suyo Proper, Uso, Man-atong ken Poblacion.

Kinuna ni Suyo Mayor Elpidio Bistoyong a nabayag a tinagtagiurayda ti pannakaangay ti KABSAT outreach program ditoy ilina gapu kadagiti nadumaduma a pagsayaatan a maited kadagiti kabarangayanda.

“Agyamankami unay kadagiti inyeg ni Gobernador DV Savellano a pagsayaatan agraman dagiti serbisio para kadagiti kabarangayan,” kinuna ni Bistoyong.

Namindua a naitantan ti pannakaangay ti KABSAT iti daytoy nga ili ngem natuloy met laengen itay Septiembre 29 idiay Suyo National High School iti Barangay Urzadan.

“Napintas la unay daytoy nga insayangkat ni Apo Gobernador ta adu ti natulonganna iti sibubukel nga Ilocos Sur nangruna dagiti pada a mannalon,” kinuna met ni Rufino Singlitan ti Barangay Man-atong.

Dinakamatna a  naited iti barangayna ti maysa a computer, kuliglig, knapsack, ken hose.

 Kinunana ni Savellano a daytoy ti rugi wenno ruangan iti nagbaetan ti gobierno ken dagiti barangay isu a dinawatna a gundawayan koma dagiti umili amin a serbisio nga inyuli dagiti agduduma nga opisina ken ahensia ti gobierno.

Naipaay iti Barangay Cabugao ti P336,000 a share daytoy iti quarry idinto a sag-P7,000 ti inawat dagiti pito pay a sabsabali kas barangay assistance.

Naisayangkat pay iti daytoy nga aldaw ti agduduma a training ken seminars para kadagiti  amin a barangay officials ken workers.

“Responsibilidad toy gobernadoryo nga idanon dagiti kasapulan dagiti barangay isu nga annadanyo koma dagitoy a maiyawat kadakayo,” kinuna ni Savellano.

Nailukat pay iti daytoy nga aldaw ti Special School for the Arts iti Suyo National High School ken ti Bago Tribe School of Living Traditions and Cultural Heritage iti Urzadan Elementary School.

Ditoy a matagiben dagiti kultura dagiti Bago a mangrugi iti ubing. Nupay maigunamgunam nga agaruat dagiti agbasbasa iti tradisional a bado iti iseserrekda iti pagadalan, high-tech ti pagadalan ta addaanda iti computer sets.#

Comments are closed.