Footer

Pamilia nakubong a minero, tulongan ti gobierno probinsial, pribado a grupo

ITOGON, Benguet – Sumagmamano a grupo ti gobierno ken pribado ti
nangipaay iti tulong kadagiti pamilia dagiti nakubong a minero iti
maysa a nagpanawan a pagminasan ditoy gapu iti isasangbay ti Bagyo Nina
itay nabiit.

Inkeddeng dagiti opisial daytoy nga ili ken probinsia ken dagiti pannakabagi ti Benguet Corporation ken ti Federation of Small-Scale Miners in Benguet ti panangitedda iti donasion kadagiti minero gapu iti idadawat ti tulong dagiti pamilia ken kakabagian dagitoy.

Maikkan iti P20,000 tunggal pamilia dagiti 16 a minero, naisalakan man wenno natay, kalpasan ti nasurok makalawas a pannakakubongda iti nagpanawan a pagminasan.

Malaksid iti tulong pinansial, nagiwaras ti gobierno probinsial iti bagas kadagiti pamilia dagiti biktima.

Simrek dagiti 16 a minero iti nasao a tunnel idi Septiembre 22 nga isasangbay ti Bagyo Nina.

Segun iti maysa a nakalasat, dida pay nabayag iti tunnel idi nagdarison ti dakkel a bagi ti danum ket kimmalabkabda iti nangatngato a paset tapno saanda a maiyanud wenno malapunos.

Naisalakan ti siam a minero iti rescue operations nga insayangkat dagiti boluntario a minero ken kameng ti Philippine Navy idinto nga innem ti naiyaon a bangkay.

Naisalakan da Antonio Pagulayan, Jose Panio Jr., Gerry Monyubda, Jason Himmayod, Robert Buhway, Garry Gano, Gilbert Nattem, Mario Anayasan, ken Rudy Boling Jr. ngem daksanggasat da Jojo Himmayod, Vincent Himmayod, Rudy Himmayod, Juan Himmayod, Marvin Himmayod, ken Joel Bulga.

Mapapati a sibibiag ti maysa a minero, ni Joseph Anayasan, ngem saan a masarakan dagiti rescuers iti nangibatianda.

Dandani mapukawen ti namnama dagiti rescuers nga adda maisalakanda gapu iti sumagmamanonl nga aldaw a pannakakubong dagiti minero iti tunnel1 ngem iti maikapito nga aldaw, naiyaonda a sibibiag ti maysa ket kadagiti simmarsaruno nga aldaw, nagsasaruno a naisalakan ti walo pay a minero.

Kinuna ni Paeng Valencia, mangidadaulo iti Rescue 911, a panggepdan nga isardeng ti panagbirokda iti nabatbati pay a minero agsipud ta mangrugin nga agalen dagiti rescuers ti sumagmamano a sakit a pinarnuay iti mapapati a kontaminado a danum iti tunnel.#

Comments are closed.