Footer

Pribado a sektor, kasapulan iti proyekto a pagpuonan: RDC chairman

San Fernando City – Segun ken ni RDC Chairman Deogracias Victor “DV”
Savellano, kasapulan unay ti iseserrek dagiti adda iti pribado a sektor
kadagiti proyekto a pagpuonan.

Kanaig daytoy, sangapulo ket innem a programa ken proyekto a mabalin a sumrekan dagiti private investors ti impresentar ti Regional Development Council bayat ti RDC meeting itoy a siudad. 

Uppat ti adda iti agriculture and fishery sector a pakairamanan ti Offshore Fisheries Development Project ti Ilocos Norte; Kenaf Production and Processing iti Alaminos City; Seaweed Mariculture Zone iti Dasol ken Infanta (Pangasinan), Badoc (Ilocos Norte), Balaoan, Sto. Tomas ken Rosario (La Union) ken Coconut Development Program for Northern Luzon Version 2 – Food and Coco Chemicals para iti sibubukel a rehion.

Pito met ti proyekto a karaman iti trade sector a pakaibilangan ti Ilocos Sur Special Economic Zone and Freeport Project iti Cabugao Ilocos Sur; Eastern Pangasinan Agro Industrial Complex iti ili ti Umingan; Pangasinan Industrial Park I and II iti Mabini ken Alaminos City; Sual Industrial Estate; Establish-ment of Common Service Facility for Food Packaging iti Ilocos Norte; ken Mango Processing Plant iti San Carlos City.

Lima met a proyekto ti adda iti sektor ti turismo a pakairamanan ti Caniaw Eco-Tourism Park Rehabilitation and Revival Project iti Bantay, Ilocos Sur; MARINA Development iti Lingayen ken Bolinao, Pangasinan; Hundred Islands Underwater Marine Park iti Alaminos City; Rosario-Kennon Junction Tourism Complex iti Rosario, La Union; ken Adopt an Island, Sponsor a Reef Development Program iti Alaminos City.

Kinuna ni Savellano a dakkel a kantidad ti kasapulan kadagiti nadakamat a proyekto ket masapul nga agawisda kadagiti adda iti pribado tapno agpuonan iti rehion.

“Dakkel a katulongan dagiti adda iti private sector para iti nadaras nga idudur-as ti rehion I,” kinuna pay ni Savellano.#