Footer

SALAYSAY: Maipanaw a sensilio: dagiti agpalpalama ti mataktakawan

The Philippines seizes 18 tons of coins bound for South Korea, kuna ti damag dagiti pagiwarnak ken iti internet. Simmeksek a dagus iti panunotko dagiti agpalpalama. Napanak nagrekorida.

“Kumusta ti kita, gayyem? Adu met laeng ti agitinnag?” sinaludsodko iti umuna a nasagangko nga agpalpalama iti overpass iti sanguanan ti Center Mall ti Baguio.

“Nakapsukapsut ‘ya! Tallo nga oraskonsan ken nabannogakon nga agkankanta ngem manmano pay laeng ti nagitinnag,” ket kinittabna ti banana cue nga intedko kenkuana.

“Apay ngata?”

“Ay-i! Adiay siguro damag ti makagapu. Badarong ‘ya!” kinunana ket uray la nagsabat dagiti kidayna iti panagmisuotna. Insardengna pay iti nagkabukab. Palpaliiwek kabayatan iti panangsisipko ti naiplastik a coke ken insanggirko met iti adigi ti overpass.

“Ania a damag dayta, gayyem?”

“Isu met laeng a manmanon ti mangitinnag ta awan san ti kowwins!” Coins ti kayatna a sawen.

“Pagkunaam nga awan ti kowwins?” napaisemak a nangtulad ti pronunciationna.

“Ay, asis, yis-ismagelda kano idiay Korea , ‘ya! Nadamagmon daydiay natiliwda a disiotso a tonelada a kowwins?”

Nagindidiammoak.

“Yismagelda kano nga impan idiay Korea. Pagaramidda iti kompiuter kano.” Computer chips ti kayatna a sawen a kas iti nailanad iti damag. “Linawas kano nga agibiaheda iti tinoltonelada a kowwins. Isu met laeng a manmanon ti agitinnag kadakami.”

“Pagkunaam, asino ngata dagiti agar-aramid iti kastoy a kalokoan?”

“Dagiti suitik a! Adda la ketdi kakonsabus dagitoy a Koreano iti gobierno ta apay a makaurnongda iti tinoleda a kowwins?”

No iti kapanunotan dagiti bulsek nga agpalpalama ket kasda la natakawan iti pannakaitalaw dagiti coins manipud ditoy pagilian, ania ngata met ti rikna dagiti umili a saan a bulsek ken saan nga agpalpalama?

“Mapitpit koma dagiti ramay dagitoy nga esmagler, ania?” kuna manen ti agpalpalama, kinurengrengna ti gitarana ket nailaoken ti pamangagen a bosesna kadagiti ungor ken busina dagiti lugan iti babaenmi. Pinaliiwko dagiti aglabas kabayatan a kankantaen ti agpalpalama ti “Ang Bayan Ko.” Napaliiwko nga adu dagiti sumardeng, kumarawada kadagiti bulsada, ngem kasla awan ti makarawada ket agin-inayaddan a pumanaw. Dagiti dadduma, saan a mamiso wenno maminting ti intinnagda ta iti paliiwko, dayta ti nakarawada iti bulsada. Adda met dagiti sumagmamano a nanglukat iti karpetana wenno coin purse, ngem no awan ti maungkatna a coins, yalud-odnan ti pumanaw. Maymaysa ti nakitak a nangipapetpet iti beinte pesos, pamaketen a simple laeng ti aruatenna, ngem nabayag sakbayna a nagsapul iti coins iti shoulder bagna ngem awan ngata ti makarawana.  

Kimmapsut ti kita dagiti agpalpalama. Katukad daytoy a panagismagel wenno panangipanaw kadagiti coins ti pagilian a panangtakaw iti subo dagiti agpalpalama.

Agtignay koma ti gobierno a mangpasardeng kadagiti kakastoy nga aramid. Economic sabotage daytoy, isu a nasken a matiliw ken mapatawan dagiti aglabsing iti kadadagsenan a pannusa a maiparbeng iti kastoy nga aramid tapno saan a tuladen dagiti agpangpanggep nga agaramid ken saan a sunotanen dagiti agar-aramid.

Iti kallabes, dagiti Intsik met ti natiliw nga agpanggep a mangipuslit kadagiti saglilima a pisos a coins.

Kas opinion ti nakapatpatangko nga agpalpalama, adda la ketdi  kakonsabus dagitoy a Koreano iti gobierno no apay a makaurnongda iti tinoltonelada. Kurapsion ti kayatna a sawen. Nakaro a talagan ti kurapsion iti pagilian ta uray iti subo dagiti agpalpalama ket mairamanen a maagaw wenno matakaw.#

Comments are closed.