Footer

3 GRO, inaresto ti polis

LAOAG CITY – Tallo a guest relations officer ti inaresto dagiti polis ditoy gapu iti mapapati a panaglakoda iti apagkanito a ragsak.

Tiniliw dagiti polis da Maricel Moralde, 18, taga-San Nicolas, Maricris Igpusay, 19, taga-Samar ken ni Crystalyn Mendoza, 19, taga-Cavite, kalpasan a nasalamaanda dagitoy iti sanguanan ti maysa a bar ditoy a mapapati nga agaw-awis kadagiti lalaki iti apagkanito a ragsak.

Segun dagiti polis, sinipsiputanda dagitoy tallo kalpasan nga adda naawatda nga impormasion ti kaadda iti prostitusion iti siudad gapu kadagiti freelance a GRO.

Kabayatanna, maysa a guest relation officer ti nakumpirmaran a positibo iti makaalis a sakit iti inspeksion nga insayangkat dagiti polis iti Bantay, Ilocos Sur kadagiti nadumaduma a videoke bars iti nasao nga ili.

Segun iti inspection team a binukel dagiti polis ken ti opisina ti salun-at a nangisayangkat iti inspeksion kadagiti videoke bars, naduktalan nga adda sakit nga STD ni Mary Karen Gralio, 21, tubo ti Baliwag, Bulacan ken mapapati nga agpapaay iti Emmareys Videoke Bar ditoy.

Naiwayat ti inspeksion babaen ti pammilin ni Police Senior Inspector Alexander Aurelio a nainget a pannakamonitor dagiti videoke bars ken no adda met laeng regular a panagpaeksamen dagiti GRO tapno maammuan no awan met laeng ti sakitda a makaalis.#

 

Comments are closed.