Footer

9 kameng ti navy a nakipaset iti rescue operation dagiti minero, napadayawan

SAN FERNANDO CITY – Maysa nga opisial ken walo a miembro ti Phil. Navy a nakabase ditoy siudad ti naikkan iti pammadayaw itay Oktubre 6 gapu iti pannakipasetda iti rescue operation kadagiti 16 a minero a nakubong iti maysa a pagminasan iti Itogon, Benguet.

Naipaayan iti military merit da Lt. Victor Ramos, Officer in Charge ti NAVSOU-2, La Union, PO2 Teofilo Fabia, PO3 Seato Camacho, PO3 Eddie Isidro, PO3 Glenn Atluna, SN1 Delfin Cabalse, SN1 Dandy Pontillas, ken SNI Michael Bashan.

Sangapulo a minero ti naisalakan idinto nga innem ti naiyaon a bangkay ti rescue operation nga insayangkat ti grupo  a nakairamanan dagiti navymenmanipud pay idi Septiembre 25 agingga iti Oktubre 2 a panangisardengda iti operasion.

Nakubong dagiti minero iti uneg ti maysa a pagminasan ti Goldfied iti Itogon, Benguet gapu iti panagdarison ti dakkel a bagi ti danum iti tunnel gapu iti Bagyo Nina.

Naisalakan ti maikasangapulo ken kaudian a mabirbirok a minero, ni Joseph Annayasan, iti pasado alas-4 ti malem iti Oktubre 3.

Nasarakan dagiti rescuers ni Annayasan iti vein 264 iti level 700 a nakapsut unayen gapu ta sangapulo ket maysan nga aldaw ti kaaddana iti tunnel.

Nakadetene ni Annayasan iti Police Regional Office-Cordillera ta nasentensiaan iti kaso a panagtakaw iti siudad ti Baguio idi 2005.

Segun ken ni Captain Oscar Santos ti Phil. Navy, iti makalawas nga operasionda iti tunnel, pito a minero ti naisalakanda ken uppat ti nairuarda a bangkay.

Inannugot ni Santos a narigat ken peligroso ti panagbatokda iti tunnel idinto nga innayonna a daytoy ti umuna a gundaway a timmulong ti Phil. Navy a nagisayangkat iti rescue operation iti uneg ti maysa a pagminasan.

Kinuna dagiti napadayawan a maragsakanda ta nakatulongda iti pannakaisalakan dagiti minero a nakubong iti tunnel ti pagminasan.#

 

Comments are closed.