Footer

BANNER NEWS: Sodium cyanide, suspetsa nakatayan 2, nakayospitalan ti pinullo a mangngalap

TAGUDIN, Ilocos Sur – Sodium cyanide ti suspetsa dagiti doktor iti maysa nga ospital ditoy a nakagapu iti pannakatay ti dua ken pannakayospital ti pinullo a mangngalap manipud iti Barangay Pilar, Sta. Cruz, Ilocos Sur.

Kinuna ni Dr. Eugene Dauz, dadaulo ti Tagudin General Hospital a panagsakit iti ulo ken tian, panagsarua, panagtakki, pannakaulaw, panaggurigor ken nairut a panaganges dagiti inagal dagiti mangngalap a naiserrek ditoy nga ospital sana innayon a suspetsana a sintomas dagitoy iti sodium cyanide poisoning.

Duan ti natay a mangngalap idinto a nasurok a 50 dagiti nayospital gapu iti kontaminado a karayan a nagbatokan dagiti mangngalap  kalpasan ti mapapati a panagaramat ti maysa a di nainaganan a mangngalap iti sodium cyanide tapno nadardaras ti panagalada iti ipon.

Nainaganan dagiti natay a da Ronald Jacinto, 28, ken Loreto Cabradilla, 48, agpada a residente iti Barangay Pilar, Sta. Cruz, Ilocos Sur idinto a naitaray iti ospital dagiti kalugaranda a pakairamanan da Arnel Pascua, 20; Patrick Pascua, 17; Mateo Antolin, 20; Benito Nalaoagan, 40; Hector Cabradilla, 49; Joel Rondaris, 25; Arnold Rondaris, 27; Christian Gaoat, 31; Edgar Cabradilla, 41; Alvin Peralta, 16; Rocky Manzano, 22; Jake Balanza, 29; Jomar Laurentino, 17; Ronald Cabuenas, 24; Erwin Cabuenas, 24; Rea An Cabradilla, 13; Orlando Corpuz, 14; Romy Bermudez, 26; Joseph Bermudez, 21, Aboy Gascon, 22; Rolando Bio, 32; ken David Manzano.

Nupay kasta, nagawid met la ti kaadduanna kadagitoy malaksid ti sumagmamano a pinagbati dagiti doktor tapno maobserbada pay.

Segun ken ni Dauz, agdagup pay iti 30 a residente iti nasao a barangay nga adda nariknada a sintomas ti pannakasabidong ti napan iti ospital tapno maipakatan iti agas kalpasan ti panangiwaragawag ni Vice Gov. Jerry Singson a libre iti iseserrekda iti ospital.

Segun iti maysa a residente ti nasao a barangay, maysa a kalugaranda ti nagaramat iti sodium cyanide tapno maparasuk dagiti ipon ket nalaklakada a mapakatan iti sayot.

Nupay kasta, nagkitakit daytoy a mangibaga iti nagan ti kalugaranda.

Kinunana pay a pammatida a saan a sodium no di ti kontaminado a karayan ti nakagapu iti pannakayospital dagiti kabarangayanna.

Ngem kinuna ni Dauz a suspetsana a dagiti sintomas ket parnuay ti cyanide poisoning.

“Ti cyanide, baraduenna ti oxygen a mapan iti bara, isu a ti tao, matay a saan a makaanges wenno agkaroon iti cardiac arrest,” kinuna ti doktor.

Iti interbio ni Dauz iti radio, kinunana nga iti historia ti pasamak,  “makalawas sakbayna, adda nagusar iti sodium cyanide iti Barangay Las-ud, nagayus ti danum ket napan iti Barangay Pilar ket daytoy ti nangsabidong kadagiti mangngalap a nagbatok a nagala iti ipon.

“Iti cyanide, no nangato ti dose, matay a dagus ti tao. Ngem siguro bassit ti trace ti cyanide (iti karayan), nain-inut a nagmanifest iti tao,” kinuna ni Dauz.

Kinuna ni Dauz nga impakaammonan ti napasamak iti Department of Health ket mangibaon daytoy iti toxicologist a mangamiris no ania talaga a kemikal ti nangsabidong kadagiti mangngalap.

Kinuna ni Dauz a maeksamen ti danum ti karayan ken maalaan iti blood sample dagiti pasiente.

Kabayatanna, kinuna ti hepe ti polis ditoy nga iti panagpalutpotda, naammuanda nga adda taga-sabali a barangay a presente iti panagbatok dagiti mangngalap iti ipon, ngem awan ti pruebada a dagitoy ti nagusar iti sodium cyanide.

Kinunana nga uray dagiti napagsaludsodanda a biktima ti pannakasabidong ket awan ti maibagada a makatulong kadakuada iti panagimbestigada.#

 

Comments are closed.