Footer

EDITORIAL: Danog iti bulan

Segun ken ni Lingayen-Dagupan Archbishop Oscar Cruz, adda pay namnama dagiti umili a rumuk-at manipud iti kuko ti kinapanglaw ken panagbisin iti sumaruno a maysa ket kagudua a tawen.

Ken ni Archbishop Cruz, daytoy sangsanguen ita ti sangalubongan a krisis ti ekonomia ket parimbawenna ti kinatibker ken kinasalukag ni Filipino.

“Ad-adu pay dagiti nadakdakes a panawen iti kallabes,” nakuna ti arsobispo, “ket saan laeng a nalasatan dagiti Filipino no di pay inaramatna a gundaway a nangital-o iti bagina.”

Ngem daytoy ti makitami a dakkel a lapped: agbatay kadagiti agtuturay iti pannakatungpal daytoy a namnama, segun iti arsobispo.

Mamati ni Cruz a nupay ababa ti maysa a tawen ken kagudua, umdas daytoy iti pannakagun-od iti panggep a pannakaruk-at dagiti umili iti kinapanglaw ken panagbisin, no la ketdi sinsero dagiti agtuturay ket rugiandan nga ipakita a maiparbeng a maited kadakuada ti panagtalek ken respeto dagiti tattao.

Iti biang ni Cruz, ti tawen a 2008 agingga iti 2010 ti panawen a panangisubli dagiti agtuturaytayo iti nasin-aw, nadalus ken makapnek a serbisio tapno magun-odda ti pannakikammayyet ken pannakitinnulong dagiti tattao.

Kenkuana, no talaga nga agbalbaliw dagiti agtuturaytayo, mapunas dagiti negatibo nga imahe ken pakabuklan a pinarnuayda iti walo a tawen a panangiturayda iti pagilian.

Nakunana pay nga iti idadanon ti 2010 ken kasarunona a tawen, agbalin a makapatalged a panawen nangruna no addan panigurado  dagiti tattao a bumaba iti turay ti agdama a liderato a natalinaay ken situtulok.

Nakuna pay ni Cruz a nagraniag ti masakbayan no masigurado dagiti umili a saan a maiwayat dagiti alternatibo a tignay a mangbaliw iti Konstitusion, turay nga emerhensia ken dadduma pay a mangituloy wenno mangpaatiddog iti panagturay ti agdama nga administrasion.

Dagitoy ti agtartaray iti panunot ti maysa a padi a nainget a kritiko ti agdama nga administration.

Makunami met: nagmayat koman a matungpal dagita nga agtartaray a panunot ti maysa nga adipen ti simbaan.

Ngem napadasantayon ti makunkuna nga Edsa revolution a nangpaksiat iti maysa nga agturay ngem kalpasanna, adda kadi nagbaliwan dagiti agtuturaytayo?

Addayta manen ti simmaruno a pannakapadisi ti maysa a Presidente gapu iti plunder, ngem adda kadi simmayaatan ti pagiliantayo babaen ti simmaruno a mangipangulo?

Ita a tawen agingga iti 2010 a pannakapili manen ti sabali a presidente, iti panagkitami, arig kasla panagbirok iti dagum iti ummong dagiti garami ti tiansa nga arakupen dagiti agtuturaytayo ti panagbalbaliw tapno magun-odda ti talek, respeto ken panangilala dagiti umili.

Wen,  asino ti saan a mangikarkararag nga adda pay panagbalbaliw iti klase dagiti agtuturaytayo.

Ngem anian, ta kasla maysa a danog iti bulan dagiti ar-arapaapen ni Cruz a panagbalbaliw#

 

Comments are closed.