Footer

Kurang nga armas, problema ti kapolisan iti La Union

SAN FERNANDO CITY – Agkurkurang dagiti service firearms dagiti polis ditoy a  probinsia, daytoy ti natakuatan ti kabarbaro a PNP regional director ditoy.

Kinuna ni Police Chief Supt. Luizo Ticman bayat ti command conference a naangay iti police provincial office iti Barangay Carlatan ditoy a siudad, daytoy ti parikut nga indanon kenkuana dagiti hepe ti polis manipud kadagiti nadumaduma nga ili ti probinsia.

Sakbayna,  ti interbiona iti media iti Binalonan, Pangasinan sakbay a nagbalin a PNP Chief, inannugot ni Gen. Jesus Versoza nga awan ti umdas nga armas ti police force ti pagilian ken agkurkurangda iti patrol car ken patrol boats.

Kinuna ni Versoza a maalana ti sabali pay a lima a tawen sakbay a marisut daytoy a problema ti panagkurkurang iti armas uray iti baet ti P10 bilion nga inyalokar ti nasional a gobierno para iti capability enhancement program ti PNP.

Segun ken ni Verzosa, iti agdama a ratio a maysa a polis iti 745 a tattao iti 80 milion a populasion ti pagilian, nababa unay no ibatay iti international standard.

Kinuna ti PNP chief a tapno maragpatda ti ratio, kasapulan nga agrekrutda iti 10,000 a polis iti tinawen.

Naammuan ken ni Versoza nga iti 5,000 a polis a narekrut itay napan a tawen kas pammilin ti General Appropriations Act, nakakiddawda iti kanayonan a nasurok a 2,000 a rekruts.

Kinuna ni Ticman nga inrusat ni PNP Chief Jesus Verzosa ti Integrated Transformation Program a pakaibilangan ti programa ti modernisasion tapno maragpat dagiti kasapulan nga armas tapno ad-adda nga epektibo ti kampania maikontra iti krimen.#

Comments are closed.