Footer

Mayor ti Tineg, 7 tattao, nakasuan iti multiple murder

BANGUED, Abra – Naisaklang ti kaso a multiple murder maikontra iti maysa a mayor ken 7 pay a tattao iti provincial prosecutor itay Oktubre 3.

Naisaklang ni Mayor ti Tineg Edwin Crisologo ken pito pay a tattao a pakairamanan da Freddie Tabas,  Sikkel Parado, Loreto Gangas, Arnold Castaneda, Robert Valera, Arnel Aguilar ken Eugenio Califlores kalpasan nga innaganan ida ti maysa a mapapati a gun for hire nga adda pannakainaigda iti pannakapapatay idi napan a tawen ni ABC President idi ti Lagayan a ni Romero Guyang.

Kuna ti polis nga intudo ni Eugenio Califlores, mapapati a gun for hire, ni Crisologo a nangited iti kuarta ken dagiti paltog a naaramat iti pannakatambang ni Guyang.

Inaresto idi Septiembre 27 ti nagtipon a bunggoy dagiti polis ti Gen.Tinio, Nueva Ecija ken dagiti operatiba manipud iti provincial police ofice ditoy ni Califlores ken ti kasinsinna a ni Sonny Califlores a nagikut iti 12-gauge shotgun.

Nupay kasta, sa la impakaammo ni Police Senior Supt. Alex Pumecha, provincial director, ti pannakaaresto ni Califlores kalpasan ti sumagmamano nga aldaw a pannakapalutpotna.

Natambang ni Guyang iti beddeng ti Barangay Pang-ot ken Ba-i iti Lagayan idi Mayo 3, 2007 ket nairaman a nagudas dagiti lima pay a kakaduana ken nakasugatan ti tallo pay.

Mapapati a napan nagpakni ni Califlores iti Barangay Rio Chico iti Gen. Tinio, Nueva Ecija kalpasan ti panagtambang ngem nasaep dagiti polis-Cordillera ti naglemmenganna.

Kinuna ti polis a naaresto ni Califlores babaen ti bileg ti warrant of arrest nga inyisio ti Bangued Regional Trial Court Branch 2 mainaig kadagiti pammapatay a napasamak idi 1990 ken 2000.#

 

Comments are closed.