Footer

Panagpukaw miembro ti militante a grupo, awan pannakaibiangmi, kuna ti 50th IB

VIGAN CITY – Pinaglibakan dagiti opisial ti militar a nakabase ditoy probinsia nga adda pannakainaigda iti panagpukaw ti maysa a miembro ti militante a grupo tallon a lawas ti napalabas.

Kinuna ni 1st Lt. Rommel Tambio, Civil Military Operations Officer ti 50th Infantry Batallion a nakabase iti  Guimod Norte, San Juan, Ilocos Sur, nga awan ti pakainaigan ti  militar ditoy iti panagpukaw ni James Balao, founding member ti Cordillera People”s Alliance (CPA), idi Septiembre 17 iti siudad ti Baguio.

Alegasion dagiti miembro ti militante a grupo a pakairamanan ti CPA ken the Cordillera Human Rights Alliance (CHRA)  a nadukot ni Balao iti asideg ti Tacdian Elementary School iti Barangay Tomay, La Trinidad, Benguet ket ti militar ti itudtudoda a nangdukot kenkuana.

Binisita ti CPA, CHRA ken dagiti miembro ti pamilia ni Balao dagiti police ken military camps ditoy probinsia ken iti Abra a pakairamanan ti 50th Infantry Battalion ti Philippine Army iti  Guimod Norte, San Juan, Ilocos Sur; Police Provincial Office iti Bulag, Bantay; ti Intelligence Service ti AFP; PNP Ilocos Sur Regional Mobile Group (RMG) iti Bio, Tagudin; 503rd Brigade iti Sulvec, Narvacan; 503rd Brigade Philippine Army (PA) headquarters iti Lagangilang, Abra; ken the PNP Regional Police Office at San Fernando, La Union.

Pinaglibakan amin dagiti opisial dagiti nabisita a units ti kaadda ti pannakaibiangda iti panagpukaw ni Balao.

Iti dialogo a naangay itay Oktubre 3 iti provincial capitol iti nagbaetan ti 50th IB ken dagiti kameng ti CPA a mangsapsapul ken ni Balao, kinuna ti kabsatna, ni Winston, a dakkel ti pammatida a politically motivated ti panagpukaw ti kabsatna ta awan met ti kakonkontrana.

Segun ken ni Beverly Longid, chairperson ti CPA, a dakkel ti pammatida a biktima ti panagdukot ni Balao agsipud ta sakbayna, nadakamat daytoy nga adda dagiti mangsursurot kenkuana.

Kinuna ni Longid nga adda pagibasaranda a mangitudo iti militar a nangdukot ken ni Balao idinto nga innayonna a saan nga isolated case daytoy ta addan dagiti kamengda a napapatay iti napalabas.

“Saaanmi met nga automatiko nga itudo ti military nga awan ti pagbasaranmi,” innayon pay ni Longid.

Ngem kinuna ni Tambio nga awan kinapudnona ti alegasion ti CPA nga adda pannakaibiangda iti panagpukaw ni Balao.

Kinunana a kas pammaneknek a dida ilemlemmeng ni Balao, pinalubosan ni Col. Roy Devesa, commanding officer, a sumrek dagiti miembro ti pamilia ti mapukpukaw iti kampo nupay saanda a napalubosan nga agitugot iti camera para iti security purposes.

Innayon ni Tambio a sisasagana ti 50th IB a makitinnulong iti CPA a mangbirok ken ni Balao.

“Alaenmi amin a detailsna ken contact numberda ta no adda lead, ipakaammomi a dagus kadakuada ken dagiti PNP tapno tumulongda met nga agsapul,” impasigurado ni Tambio.

Kinuna ni Tambio a maawatanda ti narigat a sasaaden ti mapukawan iti pamilia ken karbenganda ti agsuspetsa ngem saanda  koma nga akusaran ti militar nga adda pannakaibiangna iti panagpukaw ni Balao.

Segun iti CPA, ni Balao ti maika-94 a militante a biktima iti enforced disappearances ditoy pagilian.#