Footer

SALAYSAY: Rumangen manen ti Zarzuela Ilocana (Maudi iti dua a paset)

Idi Agosto 8, nagbalin a kasla Kodak Theater ti kapitolio ti Ilocos Sur a nakaangayan ti “Rabii ti Pammadayaw.”Agalas sais pay laeng ti sardam, in-inuten a nagsangpet dagiti artista iti entablado. Kas iti Oscar Award iti Hollywood, nagiinnartap iti kinapintas dagiti abel a gown dagiti babbai idinto a nagpustura met dagiti lallaki a kunam no adda panganakanda iti kasar. Naka-”formal attire” uray dagiti opisial ti probinsia nga indauluan ni Gob. Savellano.

Kas met laeng iti Oscar, lalo pay a nangpakaro iti “suspense” ti pannakaiyawag amin a nominees iti tunggal kategoria. Inyalat ti Solid North Dramatic Troupe ti kaaduan a pammadayaw. Napili ti estoriada a “Pammakawanmo Magun-odkonto Pay Ngata?”, kas  Best Story idinto nga inyalat pay ti direktor daytoy a ni Myrna Fabie ti Best Director Award. Inyawid pay daytoy a grupo dagiti individual awards a Best Actress (Reysheil Pascua), Best Supporting Actress (Isabelita Lopez), Best Supporting Actor (Oswald Tongson) ken Best Orchestra (Lodring Bisnan).

Binagi met ti 3A’s Production ti Best Actor Award babaen ken ni Rumulo Soller Jr.; Best Female Comedianne ni Purita Javier (Paat Dramatic Troupe), Best Male Comedianne ni Herman Quilana (PTJ Productions); Best Child Actor ni Gerald Raboy ( St. Catherine Dramatic Troupes); Best Child Actress ni Ahlanna May Cruz (Dorkia and Co.); ken Best Art Production ti AVQ Production. Immawat dagiti awardees iti premio a kuarta ken tropeo a kaarngi ni Leona Florentino.

Iti Special Awards, napili kas Star of the Night da Zenaida Pulido ken Reyshiel Pascua para kadagiti babbai ken Randy Ramolete iti lalaki. Immawat dagitoy iti cash prize, karaman dagiti amin nga nominado iti agduduma a kategoria.

Nagserbi kas hurado da Dr. Estrella Soria, Shane Tumacdang,(DepEd) Villabisyosa Mayor Marjorie Lagen ken Freddie Lazaro ti PIA.

Malaksid kadagiti awardees, napadayawan pay dagiti nangirugi iti zarzuela iti Ilocos Sur. Naiyawat ti plake ti pammigbig kada Purita Javier ken Felipe Alonzo ti Bantay, Ilocos Sur idinto a naipaay ti Posthumous Award kada Barbaro Paat (Bantay), Santiago Plana (Sta. Catalina), Remegio Paron (Vigan), Pedro Avila (Vigan), Emilio Paz (Bantay), Juan  Quiday (Vigan), Brigido Ragasa (Sta. Catalina) Nena Paron (Vigan), Antonio Peredo (Bantay),  Anselmo Pelayre (San Vicente), ken Mike Pilas Pilas (Bantay).

Iti panagsarita ni Gob. Savellano bayat ti programa, kinunana a maysa a wagas daytoy Zarzuela Ilocana Festival tapno mabigbig dagiti artista iti entablado ken dagiti mannurat ken musikero iti likudan dagiti estoria.   

“ Saan a nalaka ti agzarzuela. Masapul ti napintas a tunos dagiti amin a mangbukel iti pabuya isu a rumbeng laeng a mapadayawanda,” kinuna ti gobernador.   

Kinuna pay ni Gov. Savellano a panawenen a maisubli ti zarzuela kas atraksion, saan laeng nga iti piesta no di iti inaldaw-aldaw a panagbiag ni Ilokano.

Babaen ti NBN Vigan, plano ti gobernador ti agirekord kadagiti zarzuela a maipabuya iti station ti telebision a kukua ti probinsia. 

“Saantayo koma a kitaen ti zarzuela a kas maysa laeng a pabuya wenno paglinglingayan no di kas maysa a pakaam-amuan ni Ilokano,” inyunay-unay ni Gov. Savellano.#                   

 

Comments are closed.