Footer

Albolario, agag-agas iti tradisional a wagas, naidawat a maidokumento

VIGAN CITY – Dinawat ti maysa a medical doctor a maidokumento ti nagan dagiti amin nga albolario ken  mangisaysayangkat iti tradisional a wagas ti panagagas iti sanguanan ti mapaspasungadan a problema ti salun-at iti panagpanaw dagiti doktor iti pagilian.

Segun ken ni Dr. Jovencio Ordoña, acting director ti Philippine Institute of Traditional and Alternative Health Care (PITAHC), no agtultuloy ti panagpanaw dagiti doktor iti pagilian, agkurkurangton dagiti doktor iti las-ud ti lima a tawen manipud ita.

Kinuna ni Ordoña a gapu iti daytoy mapaspasungadan a problema, mabalin a mangituyang ti PITAHC iti training kadagiti tradisional a mangngagas kas sungbat iti health problems ti pagilian.

“Isurotayo ida iti umno a panagagas ta nupay awan ti sientipiko a batayan ken pammaneknek kadagiti ar-aramidenda, makitatayo met a maagasan dagiti pasienteda,” kinuna ni Ordoña.

Isaysayangkat pay ita ti PITAHC ti product development kadagiti herbal medicines tapno maaramatda nga agas kas paset ti panangsolbar iti nangina a presio ti agas.

Guyguyugoyen ita ni Ordoña dagiti umili nga agmula iti nadumaduma a medicinal plants ket madadaan ti opisinana a gumatang iti tonetonelada ti makaagas a bulong dagitoy, kas iti bayabas, dangla ken dadduma pay.

“No adda dagiti saan a maus-usar a daga, pagbalinenyo nga herbary. Masapul laeng a saan a kontaminado ti lugar tapno masigurado a natalgedda,” kinuna pay ti dadaulo ti PITAHC.

Kabayatanna,  inrugin ni Gob. Deogracias Victor “DV” Savellano ti nagpaaramid iti herbary iti BARang-ay kas suportana iti panawagan ti PITAHC.

“Paset pay daytoy iti ikamkampaniatayo a back to the basics wenno pannakakissay ti kemikal kadagiti ipapaunegtayo a pakairamananen ti tumtomarentayo nga agas,” kinuna ti gobernador.#

Comments are closed.