Footer

BFAD, Candon City health office, nagtsek-ap kadagiti tagilako a naggapu iti Tsina

CANDON CITY – Tapno masigurado nga awan ti mailako a produkto nga addaan melamine, nangisayangkat iti panagtsek-ap itay nabiit ti Bureau of Foods and Drugs (BFAD) ken ti City health office kadagiti pagtagilakuan ditoy siudad.

Naammuan ken ni Nimfa Pascua, city nutrition officer ditoy, bayat ti interview kenkuana ti DZTP a nagbuligan ti BFAD ken ti City health office a tsinek-ap dagiti pagtagilakuan a Novo, CSI-Candon, 4 Brothers ken dadduma pay a pagtagilakuan no adda mailaklako ditoy a produkto a naggapu iti Tsina a mapapati nga addaan iti melamine.

Kinuna ni Pascua a pakairamanan kadagiti kinitada no adda dagiti lako a gatas a naggapu iti Tsina a mapapati nga addaan melamine nga imparit ti BFAD a mailako kadagiti pagtagilakuan.

Iti kaudian a report manipud iti BFAD Manila, madama pay ti panagamirisna kadagiti dadduma pay a produkto a naggapu iti Tsina a masuspetsa nga addaan iti melamine.

Nupay kasta, imbilinen ti Department of Health ti pannakaisubli dagiti dadduma a produkto a mailako kadagiti pagtagilakuan kalpasan a napudasdasan nga awanan iti melamine.

“Negative ti inspeksionmi, kayatna sawen, awanen dagiti tagilako a naggapu Tsina nga addaan iti melamine,” kinuna ni Pascua.

Sakbayna, natakuatan iti Tsina nga adu nga ubbing nga immin-inom iti gatas nga addaan iti melamine ti nagsagrap iti sakit ti kidney.

Kinuna ni Pascua nga inkeddeng ti opisinana ken ti BFAD ti mangisayangkat iti inspeksion agsipud ta adda dagiti makitkita a tagilako a naggapu iti Tsina a mailaklako kadagiti pagtagilakuan ditoy Candon.#

Comments are closed.