Footer

Budol-Budol Gang

CANDON CITY.  Dua nga estudiante iti maysa a high school ti biniktima ti Budol-budol Gang idiay Bagani Campo ditoy.

Nagpulong iti polis dagiti biktima a da Jansen Malazo y Bagay, 13, residente iti Barangay Sibsibbu, San Emilio, Ilocos Sur ken ni Glen Marion Tamayo y Marqued, 14, residente iti Barangay Banucal, Sa Emilio, Ilocos Sur a napukawna ti selponna iti dua a lallaki a mapapati a kameng ti Budol-Budol Gang.

Kinuna dagiti biktima nga addada iti igid ti highway iti asideg ti Candon National High School, idi immasideg kadakuada ti maysa a lalaki ket nagdamag no sadino ti ayan ti paupaan a truck.

Kabayatan a makipatpatangda, sabali pay a lalaki ti immasideg.  Adda impakita dagiti di nabigbig a suspek a pouch a naglaon iti na-bundle a kuarta ket imbagada a subliendanto apaman a makitada ti kayatda nga upaan a trak.

Kas seguridad, innala dagiti suspetsa ti N70 a cellphone ni Tamayo.

Idi dina mauray dagiti dua, kinita dagiti biktima ti pouch ket naduktalanda a naglaon iti nakartib a pappapel.

Segun ken ni Tamayo, naglugan dagiti suspek iti silver nga L300.#