Footer

Choir competition, esponsoran ni Gob. Savellano

VIGAN CITY  – Iti maikaduan a tawen, esponsoran ni Gob. Deogracias Victor “DV” Savellano ti Ilocos Sur Choir Competition a pakadiskubrean ken pakaasaan iti talento  ken pannakaitandudo ti kultura ni Ilokano.

Addaan iti dua a kategoria, umuna ti pagsasalipan dagiti estudiante ken maikadua ti pagsasalisalan dagiti National, Provincial, Municipal ken NGO choirs ti probinsia.

Nasken met nga addaan ti chorale a sumali iti kompetision iti di nakurkurang ngem duapulo ngem saan a nasursurok ngem tallopulo  ti miembro .

Maysa nga Ingles, Tagalog, Ilokano ken Christmas song ti kantaen iti kaaldawan ti kompetision. Maudi nga aldaw ti panagpalista dagiti mayat a sumali inton Nobiembre 15.

 Umawat iti P30,000 ti agkampeon, P20,000 iti 1st runner-up ken P10,000 iti 2nd runner-up. Adda met 5,000 a consolation prize para kadagiti saan a mapagasatan a sumali.

Maangay ti salisal inton Disiembre 21, 2008 iti Plaza Salcedo iti siudad ti Vigan.

Mainaig itoy, agpabuya dagiti maawis a chorale groups iti tunggal malem ti Biernes mangrugi inton Oktubre 31 para iti “Serenade at the Plaza.”

Maysa daytoy a wagas ti lokal a gobierno ti Ilocos Sur a panangpasangbay iti Paskua, kinuna ni Gob. Savellano.#

Comments are closed.