Footer

Eskuela a pakaitanduduan ti kultura, dinayaw ti DepEd

SUYO, Ilocos Sur – Nagasat daytoy iliyo ta babaen ti panagtinnulong ti lokal a gobierno ken DepEd Division Office addaankayon iti pagadalan a mangitandudo iti bukodyo a kultura. Daytoy ti kinuna ti mangidaulo iti Culture and the Arts Office ti DepEd Central Office a ni Marcos Rodil bayat ti ibibisita daytoy iti kaluklukat nga Ilocos Sur Special School for Culture and the Arts (sekundaria) ken Bago School of Living Traditions and Cultural Heritage (elementaria).

Kadua ni Rodil a bimmisita idi Oktobre 14 da Dr. Mirriam Najera, Education Supervisor for Culture and Arts Region I (highschool); Dr. Oscar Flores, Education Supervisor (elementary); Ilocos Sur Asst. Schools Division Superintendent Dr. Estrella Soria ken dadduma pay manipud iti Department of Education.

Maysa kan pay daytoy a wagas tapno saan a malipatan dagiti Bago ti bukodda a kultura babaen ti panangtagiben iti arte (arts).

“Ayatentayo ti bukodtayo a kultura. Sakbay nga apresiarentayo ti kultura ti sabali a puli unaentayo nga ayaten ti bukodtayo” kinuna pay ni Rodil.

Dinawat met ti Culture and Arts Coordinator ti Ilocos Sur DepEd Division a ni Feliciano “Shan” Tumacdang Jr. a suportaran koma dagiti nagannak ken mangisursuro dagitoy baro a pagadalan no kayatda a maisubli ti panangapresiar dagiti ubbing ken agtutubo iti kultura nga in-inuten a mapukpukaw gapu iti modernisasyon. Saanda kan koma nga ibain ti agusar iti tapis ken baag. Obserbasion kan ngamin ni Tumacdang a mas kaykayaten a tuladen dagiti ubbing ti kultura ti sabali gapu ta dagitoy ti mabuybuyada iti telebision.

Iti agdama adda 27 a nakaenrol iti Ilocos Sur Special School for the Arts ken 11 iti Bago School of Living Traditions and Cultural Heritage nga addaan iti nayon nga asignatura iti ethnic dand and music.

Madama metten ti pannakipatpatang ni Tumacdang ken ni Gob. Deogracias Victor “DV” Savellano para iti pannakapaadda ti lote a pakaipasdekan dagiti baro nga school buildings dagiti pagadalan. Kasapulan kan daytoy para iti ekspansion dagiti pagadalan iti masanguanan. Karaman pay kadagiti idawatna iti gobernador ti agduduma a ramit ken pasilidades.

“Nupay maipangruna ditoy dagiti kadaanan a kannawidan, makuna met nga advance ta addaanda iti computer sets. Tay kunada ngarud a Global Competitiveness Anchored by Culture” palawag pay ni Tumacdang.

Aprobado kan' metten ti DepEd Regional Office dagiti dokumento dagiti pagadalan nga insubmitar ni Tumacdang.# 

 

Comments are closed.