Footer

Maibiahe a kaykayo, nakumpiska

SAN JUAN, La Union – Tallo a lallaki ti tiniliw dagiti polis idi awan ti maipakitada a dokumento dagiti ibiaheda natablon a kayo itay nabiit.

Naaresto da Efren Reyes y Punzalan, 31, residente iti Camilo Osias, Balaoan, La Union ken driver ti Isuzu Elf, Romeo Blanco Jr., 30, ken Anthony Directo, 24, agpada a residente ti Barangay Cabua-an, Balaoan idinto a kinumpiska dagiti polis ti 92 pedaso a mahogany a lumber a naikarga iti luganda.

Segun iti report, sinitar dagiti polis dagiti suspetsa gapu ta awan ti silaw ken plate number ti luganda nga imparadada iti asideg ti tiendaan publiko ditoy.

Mapapati nga awan ti maipakita dagiti suspetsa a dokumento iti pannakaibiahe dagiti kayo.

Maipaima iti DENR ken CENRO dagiti na-impound a lugan ken kaykayo.#