Footer

Mayor Medina, saan a pabor iti singasing a monetization ti leave credits dagiti empleado

VIGAN CITY – Saan a pabor ni Mayor Eva Marie S. Medina, a mai-monetize dagiti leave credits dagiti empleado ti gobierno ti siudad iti sanguanan ti basbassit nga internal revenue allotment (IRA) a naawat ti siudad ken ti pannakaited iti 10% salary increase kadakuada kas panagtungpal iti pammilin ni Pres. Arroyo.

“…Iti daytoy a tawen, nakissayantayo iti P4 million iti IRAtayo  ket saantayo pay a nagun-od ti panggastostayo iti sibubukel a budget nga inaprobaranda (konsehal) met laeng,” kinuna ni Medina iti interbiona iti radio.

Kinuna ni Medina nga imposible a magun-od ti income ti gobierno ti siudad agsipud ta iti rugi pay laeng, naikkatanen iti P4 million ti IRA sana sinaludsod no pangalaan iti para iti pannakai-monetize dagiti leave credits dagiti empleado ti gobierno ti siudad.

“Ken maysa pay, ti gutgutugoten dagiti empleado diay 10% increaseda… (ket) no kayatda, diay monetization ti ipangpangruna ket saantayo pay laeng nga i-increase (ti sueldo) dagiti empleado tapno mapagkanay diay pundotayo,” kinuna ti mayor.

Naammuan iti mayora nga awaten dagiti empleado ti salary increase ket retroactive iti bulan ti Hulio.

Kinuna ni Medina a milion-milion ti kasapulan no maipakuarta amin dagiti leave credits dagiti employee idinto nga impaganetgetna a magun-oddanto met laeng dagitoy iti kanito nga agretiroda iti serbisio.

Kinuna ni Medina a maysa pay a gutgutugoten dagiti empleado ti signing bonusda ket daytoy ti ibirbirokanda pay iti pondo.

“Saan met a mabalin nga ibusentayo ti kuartatayo para laeng dagiti empleado. Adda met dagiti commitmenttayo a serbisio nga itedtayo iti publiko,” kinuna ni Medina.

Kinuna ti mayor a no mai-monetize dagiti leave credits, addanto sabali a benepisio dagiti empleado a dida sagrapen.

Kabayatanna, kinuna ni Vice Mayor Franz Ranches a masapul ti naan-anay a pondo para iti full implementation ti pannakaipakuarta ti leave credits dagiti empleado ket kitaenda pay ti kapabilidad ti siudad.

Kinunana a no kabaelan ti siudad, masapul nga iprioridadda  kanaig dagiti programa ken proyekto daytoy.

Kinuna ni Ranches a dimmakkel ti magastos ti gobierno ti siudad idinto a bimmassit ti naawatna a pondo ket “… isu a masapul nga ammuen ti situasion tapno nasayaat met la ti pannakalinay daytoy monetization of leave credits.”#

 

Comments are closed.