Footer

Monetization ti leave credits, naglasat iti nabara a diskusion iti konseho ti Vigan

VIGAN CITY –  Nainget a napagdedebatean iti session ti Konseho ditoy ti singasing a pannaka-monetized ti leave credits dagiti amin nga empleado ken opisial ti siudad.

Iti panangidatag ni Konsehal Everin Molina iti daytoy a singasing, kinunana a nasayaat daytoy ken dakkel a pakalag-anan dagiti empleado ta adda insigida a pangnamnamaan ken pagtarayanda no adda emerhensia nga agkasapulan iti pinansial dagiti pamiliada ket saandan nga umutang iti mainteresan.

Ngem kinontra ni Konsehal Loreto Quibilan, chairman ti committee on finance and appropriation, ti singasing idinto nga impaganetgetna a nasaysayaat a saan a maipakuarta dagiti leave credits tapno dakdakkel ti maawat dagiti empleado iti panagretiroda.

Pabor ni Konsehal Benjo Verzosa a ma-monetized dagiti leave credits no adda la ketdi pondo.

Iti proponer ni Molina a makabulan laeng a sueldo ti ma-avail ti empleado, insingasing ni Quibilan a maximum a 10 nga aldaw laeng ti mabalin nga awaten dagiti empleado ta agdepdepende iti kabaelan ti pondo iti siudad.

Naanamongan ti singasing a 10 laeng nga aldaw ti mabalin a mai-monetized a leave credits ngem agdepende iti desision ti local chief executive no mano ti kadagupan a pondo a mailatang.

Gapuen ta kalikagum ti kaaduan ti pannakaidatag ti figure a maala manipud iti opisina ti  human resources management office  ken budget, naitantan a naaprobaran ti proposal ni Molina.#