Footer

OPINION: Saan a politika ti lubong ni Manny Pacquiao (Maudi iti dua a paset)

Nadaydaydayaw nga adayo ti itutulongna no awan iti politika. Iti politika, no nangitedka, nasken met a dumawatka. Ti nagpadawat, dumawat met. Gamitan ti situasion ditoy a lubong.  Saan a maiparbeng a termino ti makuna nga itutulong no pursigido ti panangnamnama iti kasukatna dayta a tulong.

Saan koma a masisirap ni Pacquiao iti lawag ti kinalatak ken pirak. Saan koma a maay-ayo iti nasasam-it a panagdildila dagiti tattao nga umas-asibay kenkuana. Kayat dagitoy nga  umas-asibay kenkuana nga alaen ti diro iti kalakaan a wagas a saanda a masilod wenno makagat iti uyokan.

Tuladen  koma ni Pacquiao ni Dolphy. Maibilang ni Dolphy nga institusion iti pelikula, kas kenkuana iti boksing. Naraniag ti bituenna a kas kenkuana. Inawis met dagiti politiko ni Dolphy nga agkandidato, saan laeng a diputado no di kas senador.

“Ania  koma ti aramidek iti Senado?” kinuna toy comedy king. Kunaenmi met: “Ania koma ti aramiden ni Manny iti Kongreso?”

Nagadun dagiti nalalatak a tattao a simrek iti Kongreso. Ngem ania ti ar-aramiden dagitoy? Kamengda, no di  isuda ti dadaulo, iti “committee on silence”, “committee on props” wenno paspasurot nga awan man laeng ti maputarda a linteg agsipud ta saan a politika ti pudpudno a lubongda. Iti politika, maibilangda a kas maladaga nga agkarkaradap a magna.

Husto koman ti bilang dagiti “props’ iti Kongreso ken Senado. Saan koman a manayonan pay. Kasapulan unay ti gobiernotayo dagiti competent government officials, uray isuda laengen ti pakonsuelo kadagiti agbaybayad iti buis.

Mangipatakder laengen ni Pacquiao iti foundation ken adu a gym para kadagiti boksingero – dagiti agduyos, dagiti agen-ensayo ken lalona kadagiti retirado. Ad-adda a kasapulan dagitoy dagiti kapadpadana iti dutdot.

Laglagipen koma ni Pacquiao daytoy a pagsasao: “No sadino ti yan ti apuymo, sadiay met ti yan ti lawagmo.”#