Footer

SALAYSAY: Iti maika-250 a tawenna, Arkidioses ti Nueva Segovia nagtalinaed a natibker

Dua gasut ken limapulo a tawen ti napalabas, masarakan ti arkidioses ti Nueva Segovia iti Lallo, Cagayan.  Ngem idi Setiembre 7, 1758,  naiyalis ti arkidioses  iti Villa Fernandina babaen ti maysa a royal decree nga impaulog ni Ari Fernando VI ti Espania.

Kagiddan ti pannakaiyalis ti tugaw ti Nueva Segovia iti Vigan, naited met iti daytoy a lugar ti dayaw ken pribilihio a kas maysa a siudad.

Daytoy historikal a pagteng ti rinambakan ti arkidioses ti Nueva Segovia ken ti Vigan City, Ilocos Sur ken idi Septiembre 7 daytoy a tawen.  Naisayangkat iti daytoy nga aldaw ti simboliko a panangipaima ti delegasion ti Lallo, Cagayan ti krus nga inggapuda pay iti ilida iti grupo ti Simbaan ken dagiti agtuturay ti siudad ti Vigan.

Kinapudnona, sakbay a madanon daytoy nga aldaw, plinanon dagiti opisial daytoy ti siudad ti pannakarambakna tapno nakalallagip daytoy a pagteng.  Paset ti parambak ti pannakaisayangkat ti maysa a pilgrimage idiay Lallo, Cagayan a nakipartisiparan  mismo dagiti opisial ti Vigan ken dagiti sumagmamano a padi ket manipud sadiay, kinuyogda ti simboliko a krus iti panagturongna iti Vigan City tapno maiyallawat iti arkidioses ti Nueva Segovia.

Septiembre 7, 2008

Alas tres pay laeng, naguurnongen da Mayor Maria Olivia Pascual, kaduana ti asawana ken dagiti opisial ken umili ti Lallo iti sungadan ti Vigan City ket awitda ti krus, nagnada a nagpaabagatan iti nagtengnga a Govantes dike.

Iti pagbeddengan ti Bantay ken Vigan, agur-urayen da Arsobispo Ernesto Salgado ken dagiti papadi dagiti nadumaduma a parishes iti probinsia ken deboto, Mayor Eva Marie S. Medina, dagiti opisial ti siudad ken barangay ken dagiti residente a mangsabat iti delegasion.

Inyawat ti grupo ti Lallo, Cagayan ti simboliko a krus iti grupo da Arsobispo Salgado ken Mayor Medina ti Vigan City sada nagkukuyog a nagna a nagturong iti sanguanan ti city hall a nakaipasdekan ti marker a kas tanda ti selebrasion iti maika-250 a panagtawen ti Arkidioses ti Nueva Segovia ken ti siudad ti Vigan. 

Naibasa iti abay ti marker ti kinapateg daytoy nga aldaw. Kalpasanna,  nalukaisan ti marker ken binendisionan ni Arsobispo Salgado.

Iti simple a programa sakbay ti pannakabendision ti marker, naikkan iti medalion dagiti umili ti Vigan a nayanak iti aldaw iti Setiembre 7 manipud iti kalakayan agingga iti kaubingan.

Ni Derick Dinand Borillo ti naideklara a Nueva Segovia Baby gapu ta isu ti kaunaan nga ubing a naiyanak iti aldaw a pannakarambak ti maika-250 a panagtawen ti Nueva Segovia ken Vigan City.

Manipud iti marker, imbaklay dagiti pannakabagi ti linteg ti siudad ti Vigan ti krus ket intundada iti sanguanan ti Arsobizpado de Nueva Segovia, pagtaengan ti arsobispo.  Kalpasan a naipatakder ti krus, naisayangkat ti simple a programa.

DAGITI MENSAHE

   

“Dandaniak nagsangit!” impalgak ni Arsobispo Salgado iti batangna a mangipeksa iti mensahe iti sanguanan ti ginasut a tao. Inlawlawagna a saan a maigapu iti ladingitna no gapu iti ragsak a marikriknana.

Innayon ni Arsobispo Salgado a makasangit iti ragsak gapu iti adu a bendision a nasagrap ti simbaan iti napalabas a tawtawen ken ti pannakaballasiw ti simbaan dagiti adu a riribuk ken rigat.

        (Adda tuloyna)

 

Comments are closed.