Footer

SALAYSAY: ITI INDAYON NI LAGIP: Sika a Karissabong ti Tapaoan (Maikadua a paset)

Naliday ti adda a sasaadek, Lorena. Nasumok ni baketko ti  dalan nga agpakannigid. Pinanawannak ket insukatnak iti sabali a lalaki. Daytay makaited iti ar-arapaapenna nga anak.  Awan ngamin ti anakmi bayat ti panagdennami.

Wen, Lorena, agmaymaysaak iti daytoy a lubong.  Pinadasko met ti nagbirok iti sabali a babai a mangipateg kaniak ngem napaayak. 

Namrayak ti nagputar iti daniw iti kaltaang ti rabii no diak matiliw ni ridep. Dita nga impeksak dagiti dagensen ken linaon toy barukongko.  Ngem no mariknak ti saem kadagiti binatog nga ikur-itko,   umanayen a pagarubosan dagiti luak.

Ngem iti panagam-ammota, Lorena, simmangbay ti baro a biag kaniak. Adda simmulbod manen a rusing ni ayat ditoy pusok.  Wen, Lorena, agayatak manen!

Ngem tinubngarko, minedmedak dayta a rikna.  Kasano ngamin ket dakkel ti nagbaetan ti tawenta.  Ubingka unay, Lorena.  Maysaka a karissabong iti lubongko a bangolan.

 Ngem basolko kadi no agayatak kenka?  Wen, Lorena, dinak koma mababalaw.  Natural laeng iti maysa a parsua nga addaan iti puso ken rikna a matukay iti nabanglo nga ayamuom ti karissabong a pintasmo.

Nakariknaak iti panagraem kenka ta iti baet ti kinaganusmo, awan ti naibinggas a panagduaduam a makipagayam kaniak. Dinawatko ti selpon numbermo ket intedmo met.  Banag nga ad-adda manen nga immasidegan ti riknak kenka. Dita a narangtayan ti nagbaetanta.  Ngem adda dagiti gundaway a diak mapengdan ti riknak ket imparipiripko kenka.  Nasutilka gayam,   ‘angkel’, kinunam ketdi.   Ngem iti yiisemmo iti nakasamsam-it, tumayaben ti upay iti barukongko.

Ngem basolko kadi no ayat ti mariknak kenka?  Kunada:  “age doesn’t matter”.  Iti ayat, awan ti ubing ken nataengan. Patas amin a tao iti tay-ak ni ayat. Ngem ammok a kasla iti sabut ken pinggan a saan a makapagakkub ti kayariganta. Ammok a saanak a maibagay iti karissabong a kas kenka. Kayarigam ti baggak, daydayasennak ti kinaraniagna ngem diakto pulos magaw-at.

Malagipko daydi maysa nga aldaw nga immatendarta iti pannakaangay iti anibersario ti mini-magasin a Pluma Ni Bucaneg idi Marso 17, 2006 iti siudad ti Candon.  Nagabay ti tugawta daydi a malem,  malagipmo kadi pay, Lorena?  Nakaragragsakak iti daydi a malem agsipud ta addaka iti sibayko. 

Nagbuliganta a sinangal ti pasalip iti on-the-spot poem writing contest.  Nagun-odta ti maikadua a premio.  Napalalo unay ti ragsakta idi awatenta ti sertipiko ken cash award.  Nagbingayanta ti gunggona. Ngem naragragsakak pay koma no pudno nga agayan-ayatta.

Iti panaggawidta kalpasan daydi a pasken, inyawismo ti itatabunok iti masungad a panagkasangaymo. 

“Tay regalom kaniak, dimo liplipatan,” inrabakmo pay kaniak idi bumabaak iti lugarmi.

“Wen, dika madanagan, igpilkonto inton umayak,”  impatalgedko kenka a bulon ti panangipayapayko iti imak.  Arig lumagto ti pusok iti pannakakitak ti timpuar a nasam-it nga isemmo.

Nadanon ti aldaw ti kasangaymo, Lorena.  Addakami pay la iti dalan, agkakanayonen ti panagteksmo kaniak,  sangkasaludsodmo no yankon. 

Insungbatko nga intugotko ti dua pay a barkadak a da Jhonny ken Jun.  Naglugankami iti traysikel ni Jhonny. 

Nanglintegkami iti dalan iti Barangay Turod, Sudipen, La Union.  Simmalpotkami iti kalsada nga agturong iti Barangay Cadapli, Bangar, La Union.  Iti saan a mabayag, nakadanonkami iti Barangay Castro nga arsadanan ti lugaryo.  Nagsardengkami sadiay ta saan a makasang-at ti traysikelmi.

Idi naammuam ti kaaddamin iti Barangay Castro, inteksmo a sumabatka, Lorena. Iti dayta a darikmat, diak nagawidan ti isasangbay ti karayo ditoy barukongko.

Wen, Lorena, mailiwakon a makakita manen kenka –  nalasbang a karissabong ti Tapaoan!

       (Adda tuloyna)