Footer

SARITA: Agpakasaren ni Uliteg Antokoy (Umuna a paset)

Agsagsagawisiwak a nangiparada iti pampasahero a dyip ni uliteg Antokoy a kasinsin ni nanang iti nairanta a garahe daytoy iti likod ti bungalowda. Siak ti pinusgan ni uliteg a mangipasada itoy dyip a nagatangna kalpasan nga inyalatna ti kangatuan a pammadayaw iti Brightleaf Agriculture Journalism Awards sadiay Manila sumagmamanon a bulan ti napalabas.

Napaisemak iti nalimed idi mataldiapak ti plastic laminated a ladawan ni uliteg nga impasigpitna iti sarming ti lugan. Kasla kingpin iti aruatna a puraw nga amerikana ken sapatos a lalo pay a nangipadlaw iti kinapugotna. Mangigis ti isemna iti ladawan bayat ti panangawatna iti tropeo ken kuarta a premiona. Kayatko koma nga ikkaten iti puestona ngem inyunay-unay ni uliteg a diak pulos ikkaten isu a kabutengko a sagiden ta amangan no isu ti pangikkatanna kaniak a kas drayber. Numona ta tunggal aggaraheak nga umayna sirigen ti lugan a kasla tingitingenna no adda pay met laeng a nakapaskil ti ladawanna.

Ngem iti daytoy a malem, nasdaawak ta diak makita ti anniniwan ni uliteg.

“Ne, ita man pay a saan nga immay iti ayanko,” nasaludsodko iti bagik. Sigsigud nga addaak pay laeng iti kanto nga agrebrebolusion, addan ni uliteg nga agpadpadaan iti garahe.

Intarusko ti napan nagtuktok iti ruangan ti balayda amangan no saanna a matakderan ti panagsuratna iti damdamag. Reporter ni uliteg iti La Bernardina Media wenno LBM Corp., ti kakaisuna nga estasion ti telebision ditoy Pakidilutan. Agsursurat pay kas correspondent iti aglinawas a Pakidilutan Today.

Ni Anti Mayyang nga asawana ti immay nangilukat iti ruangan.

“Ne, addakan, barok? Sumrekka pay, a,” impasabatna kaniak.

“Wen Anti. Ni Angkel? Umayko koma iyintrega toy napasadaak,” sinaludsodko kagiddan ti panangkautko iti bolsak.

“Ala, danonem dita kadaklan, barok.”

“Ne! Solo flightka met, angkel?” kinunak idi makitak nga agmaymaysa daytoy a nakasango iti uppat ti sulina a bote ti marka demonio.

“Bag la a pangiliwliwagan iti problema, barok. Kumusta ti pasada?” immulagatna ti manggapun a lumabbaga a matana.

“Adda latta met dumket, angkel, uray kastoy a kasla saanen nga agsarday ti panagpangato ti presio ti krudo,” insentimientok bayat ti panangiyawatko iti napasadaak.

Dagus a binilangna ti kuarta sana inyawat ti apagko. Tinuyaganna manen ti basona ket kasla imminum iti danum iti panangitanguapna.

“Dakkel sa ketdi ti parikutmo, uliteg?” insintirko kalpasan nga impaminduana ti nagitagay. Am-ammok ni uliteg a mangnginum ngem diak pay nakita a kastoy ti idiarna. Adda la ketdi pakaburiboranna. Inkatkatawana laeng idi pinagungtan ti maysa a mayor a nangipagarup nga isu ti nangisurat nga agraraira ti prostitusion iti ilina. Saanna nga inatrasan ti abogado a nangkopia ken nangdadael iti linaon ti estoriana iti website. Apay ngay ita a kasla isuna metten ti nakaiturongan ti paboritona a linia   a “You are such a loser” no kantiawannak?

“Awan sa ti gasat toy ulitegmo, barok. Apagturpos iti sekundaria, nangasawa a dagus  ni Olga nga inaunaak. Ita, ni met Jun ti nakasikog,” medio makasangit ti tonona. Impunasna ti rupana iti gayadan ti nadulpet a kamisetana. Nasiputak pay ti panagdiwigna a nangpakaro iti tammina.

“Kayatmo a sawen, uliteg, husto ti inlabilab ni baket Dominga itay insakayko? Kunak no tsismis laeng daydiay ta ammotayo met a reyna ti tsismis daydiay a baket,” siak met ti nakigtot ket diak napuotan nga intanguap ti sukat ni uliteg.

“U-wen varuk kusto. Nasikoganna tay gurfrenna hik!” agngadalen ni Angkel Antokoy. “Agay-ayav ti ama diay va-va-i ta dumanon ham hah-non.”

“Kaano ngarud, uliteg? Siakto met laengen a ti mangimaneho kadakayo.”

“Hinton Dominggoh varuk. Hanakidiavlo ti kastoy ha viag,” intabbaawna sa in-inut nga intugkelna ti ulona iti lamisaan ket inkidemnan.

Napangilangilak iti naammuak. Kaasi met ni uliteg, nakunak iti bagik bayat ti panangbagkatko kenkuana a nangiturong iti siledda ken ni Ikit Mayyang saak metten nagpakada nga agawid iti balaymi nga adda laeng iti ballasiw ti kalsada.

Agala-unan iti parbangon ngem saanak pay laeng nga agtuglep. Kasla makitkitak ti langa ni Uliteg Antikoy inton mapanda idanon ni dayuniorna. No kasano pasgarna idi danonenda ni Kapid Olga, siguradok a mabaliktad ti amin ita ta isuda ti dumanon. Binirok idi ni uliteg amin a di mangan-ano iti nobio ti balasangda. Uray la  inatake ti angkit di ama ti lalaki idi ilitania ni uliteg dagiti kayatna a mapasamak.

(Adda tuloyna)

Comments are closed.